انڈین صدر رام ناتھ کووند کو سبھاش چندر بوس کی تصویر کی رونمائی مہنگی کیوں پڑی؟
،تصویر کا ذریعہ@rashtrapatibhvn
انڈیا کے صدر رام ناتھ کووند کو ایوان صدر میں انڈیا کی تحریک آزادی کے اہم رہنما سبھاش چندر بوس کی 125 ویں سالگرہ کے موقع پر ان کی تصویر کی نقاب کشائی کرنا مہنگا پڑ گیا ہے۔
لیکن ایسا کیوں ہوا ہے؟ تو جناب معاملہ کچھ یوں ہے کہ انڈیا کے صدارتی دفتر یعنی راشٹر پتی بھون کے ٹوئر اکاؤنٹ سے دو تصاویر جاری کی گئی جس میں انڈیا کے صدر رام ناتھ کووند انڈیا کے تحریک آزادی کے اہم رہنما سبھاش چندر بوس کی 125 ویں سالگرہ کے موقع کی مناسبت سے انھیں خراج عقیدت پیش کرتے ہوئے صدارتی دفتر میں ان کے پورٹریٹ کی رونمائی کرتے دکھائے گئے ہیں۔
لیکن اس ٹویٹ کا جاری ہونا تھا کہ فوراً سوشل میڈیا صارفین نے انڈین صدر پر تنقید کے نشتر برسانے شروع کر دیے اور یہ سب اس لیے ہوا کیونکہ سبھاش چندر بوس کے جس پورٹریٹ کی رونمائی کی گئی وہ مبینہ طور پر غلط تصویر تھی اور اس پورٹریٹ میں سبھاش چندر بوس کی تصویر کی بجائے مبینہ طور پر بالی وڈ کے اداکار پروسنجیت کی تصویر تھی جنھوں نے ایک فلم میں سبھاش چندر بوس کا مرکزی کردار ادا کیا تھا۔
یہ بھی پڑھیے
تو بس پھر کیا تھا، انڈیا کے سوشل میڈیا صارفین کو تو حکمران جماعت بی جے پی اور صدر کووند کی اس غلطی پر تنقید کا ایسا موقع ہاتھ آیا جسے وہ بلکل گنوانا نہیں چاہتے تھے۔ مختلف سوشل میڈیا صارفین کی جانب سے مخلتف میمز اور مزاحیہ تبصروں کا سلسلہ شروع ہو گیا۔
End of سب سے زیادہ پڑھی جانے والی
،تصویر کا ذریعہ@rashtrapatibhvn
اس پر ردعمل دیتے ہوئے جوئے داس نامی ایک ٹوئٹر صارف نے لکھا ’یہ بہت مضحکہ خیز ہے۔ انڈیا کے صدر نے جس تصویر کی رونمائی کی ہے وہ تصویر نیتا جی (سبھاش چندر بوس) کی نہیں بلکہ اداکار پرسنجیت کی ہے جنھوں نے ایک فلم میں ان کا مرکزی کردار ادا کیا تھا۔ یہ تو ایسے ہی ہو گیا کہ بھگت سنگھ کی جگہ اداکار اجے دیوگن کی تصویر کی رونمائی کر دی جائے۔‘
،تصویر کا ذریعہ@Bahut_Scope_Hai
ایک اور صارف نے صدارتی دفتر کی ٹویٹ پر ردعمل دیتے ہو جواب دیا کہ ’صدر صاحب، یہ اداکار پرسنجیت کی تصویر ہے جنھوں نے قومی ہیرو (سبھاش چندر بوس) کا کردار ایک بنگالی زبان میں نبھایا تھا۔ یہ ان کی خود کی تصویر نھیں ہے۔ اگلے ہفتے آپ کو چاہیے کہ آپ گاندھی فلم کے اداکار بین کنگسلے کی تصویر کی رونمائی کریں تاکہ تصاویر کا سیٹ مکمل ہو سکے۔‘
،تصویر کا ذریعہ@krakinkrish
اسی طرح بہت سے صارفین نے صدر کی جانب سے جاری کی گئی تصاویر پر میمز جاری کرنا شروع کر دی جس میں صدر کو مخلتف فلموں میں تاریخی کردار ادا کرنے والے اداکاروں کی تصاویر کو دکھایا گیا ہے۔
جیسے کے ایک صارف نے فلم منگل پانڈے میں مرکزی کردار ادا کرنے والے اداکار عامر خان کی تصویر کو اس پورٹریٹ میں ظاہر کرتے ہوئے لکھا کہ ’صدر منگل پانڈے کو خراج تحسین پیش کر رہے ہیں۔‘
،تصویر کا ذریعہ@HumorDetected
تاہم جہاں زیادہ تر سوشل میڈیا صارفین انڈین صدر کے آفیشل ٹوئٹر اکاؤنٹ سے متنازعہ تصویر جاری کرنے پر حکومت کو تنقید کا نشانہ بنا رہے ہیں اور مزاحیہ میمز شیئر کر رہے ہیں وہیں کچھ سوشل میڈیا صارف حکومت کی حمایت میں بھی سامنے آئے ہیں اور ان کا کہنا ہے کہ انڈین صدر نے سبھاش چندر بوس کی صحیح تصویر جاری کی ہے جبکہ سوشل میڈیا پر بہت سے گروہ حکومت مخالف پروپیگنڈا کر رہے ہیں۔
،تصویر کا ذریعہ@Rishibagree
معاملہ کچھ بھی ہو لیکن انڈیا کے صدر کے سرکاری ٹوئٹر اکاؤنٹ سے اب تک نہ تو اس تصویر والی ٹویٹ کو ہٹایا گیا ہے اور نہ ہی اس پر سرکاری طور پر کوئی وضاحت جاری کی گئی ہے۔
