آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
'مغربی انداز' میں شادی کی پیشکش پر ایرانی جوڑا گرفتار
ایران میں ایک شاپنگ سینٹر میں لوگوں کی داد و تحسین کے درمیان شادی کی پیشکش اور ایجاب و قبول کرنے والے ایک ایرانی جوڑے کو گرفتار کر لیا گیا ہے۔
ملک کے شمالی شہر اراک میں منعقدہ شادی کی اس پیشکش کی ویڈیو سوشل میڈیا پر وائرل ہوگئی جس میں جوڑے کو گلاب کی پنکھڑیوں کے ایک دائرے میں کھڑا دیکھا جا سکتا ہے۔
خاتون کے 'ہاں' کہنے کے بعد اسے اپنے منگیتر کو گلے لگاتے دیکھا جا سکتا ہے جب کہ وہاں پر موجود بھیڑ اس کا جشن مناتی ہے۔
لیکن اس کے بعد پولیس نے انھیں اسلامی اصولوں کی خلاف ورزیوں کے بنا پر گرفتار کر لیا۔
ایران میں اسلامی قانون کی رو سے دو مختلف جنس کا اختلاط اور عوام کے سامنے اظہار محبت سخت منع ہے۔
یہ بھی پڑھیے
End of سب سے زیادہ پڑھی جانے والی
مرکزی صوبے کے نائب پولیس کمانڈر محمود خلاجی نے ایران کی فارس نیوز ایجنسی کو بتایا کہ جوڑے کو 'عوام کے مطالبے' پر حراست میں لیا گيا ہے۔
انھوں نے بتایا کہ ان دونوں کو عوام کی 'حمیت سے کھیلنے' کے لیے حراست میں لیا گيا اور ان کا یہ عمل 'فاسد مغربی تہذیب کے اثرات کا نتیجہ ہے۔'
مسٹر خلاجی نے کہا کہ انھیں ضمانت پر رہا کر دیا گیا ہے۔
اس واقعے نے سوشل میڈیا پر عوام کے سامنے شادی کی پیشکش اور ایران میں رائج وسیع تر سماجی پابندیوں پر گرما گرم بحث چھیڑ دی ہے۔
ایک ٹوئٹر صارف نے لکھا: 'بے چارے، جشن منانے کے بجائے انھیں خود کو روتے ہوئے ضمانت پر رہا کروانا پڑا!'
ایک دوسرے صارف نے لکھا: 'یہ مضحکہ خیز ہے اور یہ عمل کیمرے کے لیے تھا۔ شادی جیسی ذاتی چیز کو تماشا کیوں بنایا جائے۔'
ایسا پہلی بار نہیں ہے کہ عوام کی غیرت و حمیت پر عمل پیرا ایران کے قانون کی جانب بین الاقوامی سطح پر لوگوں کی نظر گئی ہے۔
گذشتہ سال مشہد کے ایک شاپنگ مال میں ایک اہلکار کو اس لیے گرفتار کیا گیا تھا کہ ایک تقریب میں وہاں لوگوں کی رقص کرتے ہوئے فلم تیار کی گئی تھی۔
