انڈیا: وزیر کی کھیت میں پیشاب کرتے ہوئے ویڈیو وائرل، حکومت پر تنقید
،تصویر کا ذریعہRam Shinde/Facebook
انڈیا میں حکمراں جماعت بھارتیہ جنتا پارٹی کے وزیر کو کھلے عام پیشاب کرنے پر تنقید کا نشانہ بنایا جا رہا ہے۔
انھوں نے کھلے میں پیشاب ایسے وقت پر کیا ہے جب حکومت لوگوں کو ٹوائلٹس استعمال کرنے کی ترغیب کے لیے مہم چلائی ہوئی ہے۔
جونیئر وزیر برائے پانی رام شندے کی ایک ویڈیو وائرل ہوئی ہے جس میں ان کو مہاراشٹرا کے کھیتوں میں پیشاب کرتے ہوئے دکھایا ہے۔
حزب اختلاف کا کہنا ہے کہ اس سے ظاہر ہوتا ہے کہ وزیر اعظم نریندر مودی کی یہ مہم ناکام ہو چکی ہے۔
تاہم رام شندے نے کہا ہے کہ ان کی طبیعت خراب تھی اور آس پاس ٹوائلٹ نہ ہونے کے باعث انھوں نے کھیت میں پیشاب کیا۔
End of سب سے زیادہ پڑھی جانے والی
انھوں نے مزید کہا کہ وہ گذشتہ ماہ سے زرعی سکیم کی نگرانی کے لیے سفر کر رہے ہیں۔ 'مسلسل سفر اور سخت گرمی اور دھول کے باعث میری طبیعت ناساز ہو گئی۔ مجھے بخار بھی تھا۔'
لیکن مہاراشٹرا کی اپوزیشن جماعت نیشنل کانگریس پارٹی کا کہنا ہے کہ اہم شاہراہ پر وزیر صاحب کو ٹوائلٹ نہ ملنے سے صاف ظاہر ہے کہ حکومت پبلک ٹوائلٹس مہیا کرنے میں ناکام ہو گئی ہے۔
'وزیر اعظم عوام سے کیسے یہ توقع کر سکتے ہیں کہ وہ نظم و ضبط کا مظاہرہ کریں جب ان کے اپنے وزیر ہی نہیں کر رہے۔'
یاد رہے کہ نریندر مودی نے ملک گیر مہم 'صاف انڈیا' کا آغاز 2014 میں کیا تھا اور وعدہ کیا تھا کہ ملک بھر میں لاکھوں ٹوائلٹس تعمیر کرائیں گے۔
تاہم ناقدین کا کہنا ہے کہ اس ملک کے زیادہ تر علاقوں میں اس مہم کا کوئی اثر نہیں ہوا۔
