اعجاز مہر بی بی سی اردو ڈاٹ کام، اسلام آباد

	امریکی سینیٹ کا اعلیٰ سطح وفد عراق، پاکستان اور افغانستان کے دورے پر ہے

مسٹر جوزف بائیڈن جو امریکی سینیٹ کی خارجہ امور کی کمیٹی کے چیئرمین کے طور پر اپنا آخری دورہ کر رہے ہیں، پاکستان کی سیاسی اور فوجی قیادت سے ملاقاتیں کریں گے۔ وفد میں سینیٹر جان کیری، جیک ریڈ، سوسن کولنز اور لنڈسے گراہم شامل ہیں۔

وزیراعظم کے ایک ترجمان کے مطابق جمعہ کی شام کو جو بائیڈن کی سربراہی میں امریکی وفد سید یوسف رضا گیلانی سے ملاقات کرے گا۔ حکومتی ذرائع کا کہنا ہے کہ پاکستانی قیادت امریکی وفد سے عالمی، علاقائی اور دو طرفہ امور پر بات کریں گے۔

پاکستان کے دفتر خارجہ کے ایک افسر نے بتایا کہ پاکستان کے صدر اور وزیراعظم امریکہ کے نو منتخب نائب صدر کے ساتھ پندرہ ارب ڈالر کے پیکج، دہشت گردی کے خلاف جنگ، پاکستان اور بھارت میں کشیدگی کم کرنے، مسئلہ کشمیر کے حل کے لیے نتیجہ خیز اقدامات کرنے، فلسطین پر اسرائیلی حملے بند کرنے اور اس کا پائیدار حل تلاش کرنے کے موضوعات پر بات کریں گے۔

امریکی سینیٹ کا اعلیٰ سطح وفد عراق، پاکستان اور افغانستان کے دورے پر ہے اور امکان ہے کہ وہ بھارت کا دورہ بھی کریں گے۔

جو بائیڈن کی ترجمان ایلزبیتھ الیگزینڈر نے پانچ جنوری کو امریکی ذرائع ابلاغ کو بتایا تھا کہ ’فیکٹ فائنڈنگ وفد عالمی رہنماؤں پر واضح کرے گا کہ وہ امریکی حکومت کی جانب سے بات چیت کرنے آئے ہیں اور نہ ہی نئی امریکی انتظامیہ کی پالیسی سے انہیں مطلع کرنے آئے ہیں۔‘

مسٹر بائیڈن کی ترجمان کا وہ بیان اپنی جگہ لیکن پاکستان کے کئی مبصرین کہتے ہیں کہ اس اعلیٰ سطحی وفد کے دورے کا مقصد امریکہ کی مشرق وسطیٰ، جنوبی ایشیا باالخصوص مسئلہ کشمیر اور دہشت گردی کے خلاف جنگ کے متعلق اوبامہ انتظامیہ کی پالیسی پر نظر ثانی کے لیے حقائق جاننا ہے۔