رفعت اللہ اورکزئی بی بی سی اردو ڈاٹ کام پشاور

	طالبان کے ایک ترجمان کے مطابق یہ عمل طالبان کے خلاف لشکر تشکیل دینے پر کیا گیا ہے

طالبان کے ایک ترجمان کے مطابق یہ عمل طالبان کے خلاف لشکر تشکیل دینے پر کیا گیا ہے۔

طالبان ترجمان مولوی عمر نے بی بی سی کو کسی نامعلوم مقام سے ٹیلی فون پر بتایا کہ سوات میں پیر سمیع اللہ کی لاش مسلکی اختلافات کی وجہ سے نہیں لٹکایا گیا بلکہ ان کے خلاف یہ ایک انتقامی کارروائی کی گئی ہے۔ انہوں نے کہا کہ پیر نے مقامی طالبان کے خلاف لشکر تشکیل دیکر حکومت کا ساتھ دیا اور عسکریت پسندوں کے مقابلے پر کھڑا ہوگیا تھا۔

انہوں نے وضاحت کی کہ پیر سمیع اللہ کو قبر سے نکال اس کی لاش اس لیے لٹکائی گئی تاکہ آئندہ کوئی طالبان کے خلاف لشکر تشکیل دینے کی جرات نہ کرے اور جوکوئی ایسا کرے گا تو اس کا قبر بھی کسی کو نہیں ملے گا۔

مولوی عمر نے مزید بتایا کہ قبائلی علاقوں اور صوبہ سرحد میں حکومت کی طرف سے طالبان کے خلاف لوگوں کو اٹھانے کی پالیسی ناکام ہوگئی ہے کیونکہ عسکریت پسندوں نے مختلف علاقوں میں لشکرکے سربراہوں کو قتل کرکے ان کا خاتمہ کردیا ہے۔ انہوں نے کہا کہ باجوڑ، درہ آدم خیل، اورکزئی ایجنسی، مہمند اور سوات میں حکومت کی طرف سے بنائے لشکر ختم ہوگئے ہیں اور طالبان ان کے مقابلے میں کامیاب ہوگئے ہیں۔

دو دن قبل سوات میں عسکریت پسندوں نے طالبان مخالف لشکر کے سربراہ پیر سمیع اللہ کی لاش قبر سے نکال کر اسے چوک میں لٹکا دی اور بعد میں اسے نامعلوم جگہ پر دفنا دیا تھا۔

عراق میں ایک مقامی صحافی کی طرف سے امریکی صدر جارج بش پر جوتا پھینکنے کا خیرم مقدم کرتے ہوئے طالبان ترجمان نے کہا کہ وہ ’بہادر‘ صحافی کو خراج تحسین پیش کرنے کےلیے اس کا جوتا ایک کروڑ روپے میں لینے کےلیے تیار ہیں۔

انہوں نے کہا کہ صحافی نےامریکی صدر پر جوتا پھینک کر جرآت کا مظاہرہ کیا ہے اور اپنے قوم کی نمائندگی کی ہے۔