احمد رضا بی بی سی اردو ڈاٹ کام، کراچی

	سندھ ہائی کورٹ سے سول ججوں کی تعیناتی کا اختیار واپس

سندھ ہائی کورٹ بار ایسوسی ایشن نے اس فیصلے کی سخت مخالفت کی ہے اور اسکے خلاف احتجاجی مہم چلانے اور ہائی کورٹ سے رجوع کرنے کا فیصلہ کیا ہے۔

کراچی میں جمعرات کو ہونے والے ہائی کورٹ بار ایسوسی ایشن کی منیجنگ کمیٹی کے اجلاس میں حکومتی فیصلے کے خلاف قرار داد منظور کی گئی اور اسے عدلیہ کی آزادی اور آئین اور قانون کی خلاف ورزی قرار دیا گیا۔

ہائی کورٹ بار کے سیکریٹری منیر الرحمن نے بی بی سی سے بات کرتے ہوئے کہا
کہ اس فیصلے سے چھوٹی عدالتوں کے ججوں کی تقرری میں سیاسی مداخلت بڑھ جائے گی جس سے انصاف کی فراہمی کا پورا نظام متاثر ہوگا۔

”پبلک سروس کمیشن ایک آزاد ادارہ نہیں ہے اور جب سول ججوں کی تقرری پر ہائی کورٹ کا کوئی کنٹرول نہیں ہوگا تو یہ عمل شفاف نہیں رہے گا اور اس میں حکومت کی مداخلت بڑھ جائے گی۔،،

انہوں نے کہا کہ سابقہ طریقہ کار کے تحت ہائی کورٹ ضابطے کی تمام کارروائیاں مکمل کرنے کے بعد سول ججوں کی تقرریاں کرتی تھی جس میں تحریری ٹیسٹ اور انٹرویو وغیرہ شامل ہوتا تھا اور اسکے بعد ہائی کورٹ کی انتظامی کمیٹی تقرری کا فیصلہ کرتی تھی۔
”وکلاء کورٹ کے سامنے پیش ہوتے ہیں اور کورٹ کے علم میں ہوتا ہے کہ جس وکیل نے سول جج کے عہدے کے لئے درخواست دی ہے وہ کتنا قابل ہے اور اس میں انصاف کی فراہمی کی اہلییت ہے یا نہیں۔ تو جب ایک جج انٹرویو کرتا ہے تو زیادہ بہتر ہوتا ہے، اسی لئے ہم یہ چاہتے ہیں کہ اختیار ہائی کورٹ کے پاس ہی رہے۔،،

انہوں نے بتایا کہ اگر حکومت نے سندھ جوڈیشیئل سروسز رولز 1974ء میں کی گئی ترامیم واپس نہ لیں تو وکلاء احتجاجی مہم شروع کریں گے اور ہائی کورٹ میں اس کے خلاف آئینی درخواست بھی داخل کی جائے گی۔

ہائی کورٹ بار کی منیجنگ کمیٹی نے اس مسئلے کو ملکی اور بین الاقوامی فورمز پر اٹھانے کا بھی فیصلہ کیا ہے۔