غلط فون پر ہندوستان اور پاکستان کے درمیان حادثی جنگ کا امکان بڑھ گیا

اس فون پر صدر آصف زرداری دھوکہ کھاگئے اور حکومتِ پاکستان نے اپنی افواج فوری طور پر ’ہائی الرٹ‘ پر کردیں۔ پاکستانی ذرائع ابلاغ کے بعد سفارتی اور سکیورٹی ذرائع نے اس فون کی تصدیق کردی ہے اور اس کی تحقیقات بھی کی جارہی ہے۔

صدر زرداری کو اس غلط فون کے بعد بھارت اور پاکستان کے درمیان حادثاتی جنگ کے امکانات کافی حد تک بڑھ گئے تھے اور چوبیس گھنٹوں تک کشیدگی کا عالم بنا رہا۔

بات چیت کے دوران فون کرنے والے نے صدر زرداری کے مصالحانہ انداز کو نظر انداز کرتے ہوئے فوری طور ممبئی حملوں کے ذمہ داروں کے خلاف کارروائی نہ ہونے کی صورت میں فوجی حملے کی دھمکیاں دی۔

اس غلط فون کے نتیجے میں ایک خصوصی طیارہ ہندوستان بھیجا گیا کہ وہ پاکستانی وزیر خارجہ شاہ محمود قریشی کو، جو کہ بھارت میں تھے، پاکستان واپس لائے جبکہ وزیراعظم رضا گیلانی کو کہا گیا کہ وہ فوری طور لاہور سے اسلام آباد آجائیں۔

اس دوران پاکستانی فضائیہ الرٹ پر رہی۔ اسلام آباد اور واشنگٹن کے درمیان سفارتی رابطے کیے گئے۔ امریکی وزیر خارجہ کونڈولیزا رائس سے بات کی گئی جنہوں نے اپنے بھارتی ہم منصب پرنب مکھرجی سے اس بارے میں بات کی۔ رائس کے رابطے پر پرنب مکھرجی نے کسی فون کال کی تردید کی۔

اسلام آباد میں ایک اعلیٰ اہلکار نے ڈان اخبار کو بتایا: ’جنگ شاید اتنی قریب نہیں تھی لیکن کوئی خطرہ مول لینا ممکن نہیں تھا۔‘