رفعت اللہ اورکزئی
بی بی سی اردو ڈاٹ کام پشاور |  |
| | | اختر نواز خان آزاد حیثیت سے ہری پور سے منتخب ہوئے اور بعد میں اے این پی میں شمولیت اختیار کی |
صوبہ سرحد کے ضلع ہری پور میں حکام کا کہنا ہے کہ سابق صوبائی وزیر اور سرحد اسمبلی کے رکن اختر نواز خان ایک قاتلانہ حملے میں ہلاک ہوگئے ہیں۔ پولیس کے مطابق یہ واقعہ بدھ کی شام کلابٹ کے علاقے میں افطاری سے تقریباً ایک گھنٹہ پہلے پیش آیا۔ ہری پور پولیس کے ایک اہلکار بشیر نے بی بی سی کو بتایا کہ اختر نواز خان ایک جنازے میں شرکت کے بعد گھر جارہے تھے کہ دو نامعلوم موٹر سائیکل سواروں نے ان کی گاڑی پر اندھا دھند فائرنگ کردی جس سے وہ ہلاک ہوگئے جبکہ ان کے محافظ شدید زخمی ہو گئے۔ پولیس نے پوسٹ مارٹم کے بعد لاش مرحوم کے ورثا کے حوالے کردی ہے۔ پولیس نے واقعہ کو پرانی دشمنی کا شاخشانہ قرار دیا ہے۔ اختر نواز خان فروری دو ہزار آٹھ کے عام انتخابات میں آزاد حیثیت سے ہری پور سے رکن صوبائی اسمبلی منتخب ہوئے اور بعد میں حکمران جماعت عوامی نشینل پارٹی میں شمولیت اختیار کی۔ مرحوم دو ہزار دو کے عام انتخابات میں بھی رکن اسمبلی منتخب ہوئے اور ایم ایم اے کے حکومت میں صوبائی وزیر کے عہدے پر فائز رہے۔ وہ جمعیت علماء پاکستان کے بھی مرکزی عہدیدار رہ چکے تھے۔ | 
سرحد: نئے صدارتی انتخاب کا مطالبہ
