حسن مجتبی بی بی سی اردو ڈاٹ کام، نیویارک

	پاکستانی حکومتی حلقے وزیر اعظم کے امریکی دورے کو بہت ہی مفید اور کامیاب قرار دے رہے ہیں

وزیر اعظم گیلانی اور سینیٹر اوبامہ کی ملاقات ایک گھنٹہ جاری رہی۔ ملاقات کے بعد چند مِنٹوں کے لیے پاکستانی وزیر اعظم ہوٹل کی اس لابی میں منتظر و موجود صحافیوں کے پاس رکے اور انہیں بتایا کہ بارک اوبامہ سے ان کی ملاقات بہت ہی خوشگوار رہی۔

جب صحافیوں نے وزیر اعظم سے ملاقات کی تفصیلات پر استفسار کیا تو انہوں نے کہا کہ ’میں اس وقت ان کی (اوبامہ کی) مہم کا حصہ نہیں بننا چاہتا بس اتنا ہی کہوں گا کہ ملاقات بہت ہی اچھی رہی۔‘

توانائی کا شعبہ سندھ کے وزیر اعلیٰ سید قائم علی شاہ اور وفاقی وزیر پانی اور توانائي راجہ پرویز ا شرف نے ایک پریس کانفرنس میں کہا کہ پاکستان کے صوبۂ سندھ کے علاقے تھر میں کوئلے کے ذخائر و پیداوار پر کئي امریکی سرمایہ کاروں اور کمپنیوں سے ان کی بات ہوئی ہے

اگرچہ پاکستانی حکومتی حلقے وزیر اعظم کے امریکی دورے کو بہت ہی مفید اور کامیاب قرار دے رہے ہیں لیکن واشنگٹن کے تجزیہ نگاروں کا کہنا ہے کہ وزیر اعظم کے دورے کی کامیابی میں کافی مشکلات ہیں اور اسے صرف امریکی حکام اور رہنماؤں سے تعلقات عامہ کی مشق ہی کہا جاسکتا ہے۔

دوسری طرف وزیر اعظم کے وفد میں اب شامل سندھ کے وزیر اعلیٰ سید قائم علی شاہ اور وفاقی وزیر پانی اور توانائي راجہ پرویز ا شرف نے ایک پریس کانفرنس میں کہا کہ پاکستان کے صوبۂ سندھ کے علاقے تھر میں کوئلے کے ذخائر و پیداوار پر کئي امریکی سرمایہ کاروں اور کمپنیوں سے ان کی بات ہوئی ہے۔

سندھ کے وزیر اعلیٰ نے صحافیوں کے سوالوں کے جوابات دیتے ہوئے کہا کہ تھر کے کوئلے سے وفاق اور صوبہ سندھ کو برابر کا فائدہ حاصل ہوگا اور بقول ان کے جو لوگ یہ بات کر رہے ہیں کہ سندھ کو اس کا برابر کا حصہ نہیں ملے گا اور وفاق تھر کے کوئلے کی آمدنی لے جائے گا وہ قدامت پسند لوگ ہیں۔

یاد رہے کہ تھر کے کوئلے پر وفاقی کی طرف سے تھر کول اتھارٹی کے قیام کو کئي ناقدین جن میں کچھ صوبائي حکومت کے ٹیکنو کریٹس بھی شامل ہیں وفاقی حکومت کی طرف سے صوبائي خودمختاری میں مداخلت کہہ رہے ہیں۔