ارمان صابر بی بی سی اردو ڈاٹ کام، کراچی

	حصص بازار پانچ سو اٹھارہ پوائنٹس کی کمی کے بعدگیارہ ہزار ایک سو ستتر پوائنٹ پر بند ہوا

شروع ہی سے مندی کا رحجان رہا اور مارکیٹ سوا پانچ سو پوائنٹس تک گر گئی۔ ماہرین کے مطابق ملک کی صورتحال کی وجہ سے سرمایہ کاروں میں عدم دلچسپی کا رحجان پیدا ہوا ہے اور حصص کا لوئر لاک ایک سے پانچ فیصد کردیا گیا ہے اور لوگوں نے اپنے حصص زیادہ تر کم ترین قیمت پر فروخت کیے اور مارکیٹ گرتی چلی گئی۔

مارکیٹ کے تجزیہ کار اظہر باٹلہ کے مطابق پانچ فیصد لوئر لاک کے فیصلے کے بعد توقع تھی کہ مارکیٹ میں گراوٹ بہت تیزی سے ہوگی لیکن مقامی سرمایہ کاروں اور اداروں کے سہارے سے مارکیٹ میں کچھ بہتری آ سکتی ہے۔ تاہم سیاسی حالات اور سرحدی صورتحال کچھ ایسی ہے کہ سرمایہ کاروں کی دلچسپی کم ہوگئی ہے۔

ان کے بقول مارکیٹ میں استحکام کے تمام اشارے موجود ہیں اور آنے والے دنوں میں اگر سیاسی بہتری ہوئی اور سعودی عرب کی جانب سے تیل کے عوض واجبات کی وصولی میں توقف کا فیصلہ ہواتو مارکیٹ سے بہتری کی امید کی جا سکتی ہے۔

سائڈ لائن سودے  مارکیٹ میں نہ ہونے والے سائڈ لائن سودے بھی بازارِ حصص پر دباؤ بڑھا رہے ہیں اور ان کی وجہ سے دوسرے سودوں پر بھی اثر پڑ رہا ہے تجزیہ کار

افواہوں کے بارے میں اظہر باٹلہ نے کہا کہ مارکیٹ میں آج افواہوں کا دور دورہ نہیں تھا بلکہ لوئر لاک جو آج سے پہلے ایک اعشاریہ ایک فیصد لگا ہوا تھا وہ پانچ فیصد کردیا گیا اور اس کا فائدہ اٹھاتے ہوئے سرمایہ کار ان کے بروکر دونوں نے اپنے سودوں کو کم ترین قیمت پر فروخت کرنے لگے جس کی وجہ سے مارکیٹ گرتی چلی گئی۔

انہوں نے کہا کہ یہ قدرتی امر تھا کیونکہ سرمایہ کار جن کے سودے گزشتہ دس یا گیارہ سیشن میں نہیں ہوسکے تھے وہ بھی اسی امید میں تھے کہ جیسے ہی پانچ فیصد کے لوئر لاک پر عملدرآمد ہوگا تو وہ اپنے سودے کم ترین قیمت پر فروخت کریں گے اور اسی وجہ سے مارکیٹ میں سارا دن مندی کا کاروبار ہوا۔