احمد رضا بی بی سی اردو ڈاٹ کام، کراچی

	’حکومت کا کوئی بھی ادارہ ایسا نہیں ہے جو اس قیمت کو کنٹرول کرے‘

یہ درخواست ایک وکیل مقبول الرحمٰن ایڈووکیٹ نے داخل کی ہے جس میں پیٹرولیم اور قدرتی وسائل کی وفاقی وزارت، آئل اینڈ گیس ریگولیٹری اتھارٹی، سی این جی ڈیلرز ایسوسی ایشن، پاکستان سٹیٹ آئل اور ایندھن فروخت کرنے والی دو نجی کمپنیوں کو فریق بنایا ہے۔

درخواست میں کہا گیا ہے کہ حکومت نے دو جولائی کو سی این جی کی قیمت میں اکتیس فیصد اضافے کا اعلان کیا تھا جس کے بعد سی این جی ڈیلرز نے اسی حساب سے قیمتیں بڑھا دی تھیں لیکن اگلے ہی دن حکومت کی جانب سے یہ وضاحت آئی کہ چار روپے کا اضافہ کیا گیا ہے۔

درخواست گذار کے مطابق حکومت کی وضاحت کے بعد سی این جی کی نئی قیمت تینتالیس روپے پچاسی پیسے فی کلوگرام بنتی ہے لیکن فیول سٹیشنز پر سی این جی کی قیمت اب تک سینتالیس روپے پچیس پیسے فی کلو گرام وصول کی جا رہی ہے۔

مقبول الرحمٰن نے بتایا ’سی این جی فروخت کرنے والوں کا کہنا ہے کہ جو قیمت وہ وصول کر رہے ہیں وہ سی این جی ڈیلرز ایسوسی ایشن نے مقرر کی ہے اور یہ کہ وہ صرف ایسوسی ایشن کی ہی بات مانیں گے۔‘

درخواست گذار کا کہنا ہے کہ حکومت کا کوئی بھی ادارہ ایسا نہیں ہے جو اس قیمت کو کنٹرول کرے اور اس کے باعث لوگوں کا کروڑوں روپیہ سی این جی ڈیلرز کے پاس چلا گیا ہے۔

سی این جی فروخت کرنے والوں کا کہنا ہے کہ جو قیمت وہ وصول کررہے ہیں وہ سی این جی ڈیلرز ایسوسی ایشن نے مقرر کی ہے اور یہ کہ وہ صرف ایسوسی ایشن کی ہی بات مانیں گے۔ مقبول الرحمٰن

درخواست میں استدعا کی گئی ہے کہ سی این جی کی قیمت میں ناجائز اضافے کے تحت عوام سے جو اضافی پیسہ لیاگیا ہے اسے واپس لیا جائے اور اسے گاہکوں کو واپس دیا جائے یا پھر سٹیٹ بینک آف پاکستان میں جمع کرایا جائے اور اس پیسے کو جیلوں کے اندر قیدیوں کی فلاح و بہبود پر خرچ کیا جائے۔

درخواست میں ان سرکاری افسران کے خلاف قانونی کارروائی کا بھی مطالبہ کیا گیا ہے کہ جنہوں نے غلطی سے سی این جی کی قیمت میں اکتیس فیصد اضافے کا نوٹیفیکیشن جاری کیا اور اس کی وجہ سے لوگوں سے بھاری رقم زائد وصول کی گئی۔

چیف جسٹس سندھ ہائی کورٹ جسٹس عزیز اللہ میمن نے پیر کو درخواست سماعت کے لیے منظور کرلی اور فریقین کو نوٹس جاری کرتے ہوئے سماعت دس جولائی کو مقرر کی ہے۔