امداد علی سومرو لاہور

	تمام لاپتہ افراد کو فوری طور پر بازیاب کروایا جائے جنہیں آئی ایس آئی اور دیگر خفیہ ایجنسیوں نے ’عقوبت خانوں‘ میں رکھا ہوا ہے: ہیومن رائٹس واچ

وہ لاہور میں انسانی حقوق کمیشن پاکستان کے ڈائریکٹر آئی اے رحمان اور دیگر کے ہمراہ پریس کانفرنس کر رہے تھے۔

کن رتھ نے میڈیا کو بتایا کہ انہوں نے اپنے دورہِ پاکستان کے دوران وزیراعظم سید یوسف رضا گیلانی، وزیر قانون، وزیرِ اطلاعات کے علاوہ میاں نواز شریف، دیگر رہمنائوں اور وکلا کے قائدین سے بھی ملاقاتیں کیں۔

ان کا کہنا تھا کہ انہوں نے وزیر اعظم یوسف رضا گیلانی پر زور دیا کہ معزول چیف جسٹس افتخار محمد چوھدری سمیت ان تمام ججوں کو فوری طور پر بحال کیا جائے، جن کو تین نومبر دو ہزار سات کو غیرقانونی طور پر ہٹایا گیا تھا۔

ساتھ ہی انہوں نے ان سے یہ بھی مطالبہ کیا کہ ان تمام لاپتہ افراد کو فوری طور پر بازیاب کروایا جائے جن کو آئی ایس آئی اور دیگر خفیہ ایجنسیوں نے ’عقوبت خانوں‘ میں رکھا ہوا ہے۔مسٹر رتھ نے کہا کہ اگر ان میں کوئی کسی جرم میں ملوث بھی ہے تو اسے ملکی قانون کے مطابق عدالت میں پیش کیا جائے۔

انہوں نے یہ بھی مطالبہ کیا کہ شہریوں کو جبری طور پر لاپتہ کرنے سے متعلق پاکستان، اقوام متحدہ کے کنوینشن دستخط کرے۔

انہوں نے کہا کہ پرویز مشرف غیر قانونی صدر ہیں اور ان کے دور میں ہونے والی انسانی حقوق کی خلاف ورزیوں پر ان کا احتساب کیا جائے۔

انہوں نے یہ بھی مطالبہ کیا کہ ان تمام حاضر سروس یا ریٹائرڈ فوجی اور سویلین حکام کا احتساب کیا جائے جو بقول ان کے انسانی حقوق کی خلاف ورزیوں میں ملوث رہے ہیں۔ انہوں نے کہا کہ فوجی حکومت کے دوران کئے گئے جرائم میں ملوث افراد کا بھی محاسبہ ہونا چاہیے۔

کین رُتھ نے کا کہنا تھا موجودہ جمہوری حکومت آنے کے بعد شہریوں کے سیاسی اور بنیادی انسانی حقوق کے حوالے سے کئی مثبت تبدیلیاں رونما ہوئی ہیں۔ جن میں سزائے موت کے قیدیوں کی سزائیں عمر قید میں تبدیل کرنا بہت خوش آئند فیصلہ ہے۔ تاہم انہوں نے حکومتِ پاکستان پر زور دیا کہ موت کی سزا کا قانون ہی ختم کیا جائے تا کہ مستبقل میں کسی بھی جرم میں ملوث شہری کو موت کی سزا نہ سنائی جا سکے۔

انہوں نے طلبہ اور ٹریڈ یونینوں پر سے پابندی ہٹائے جانے کے اقدام کو بھی سراہا اور ساتھ ہی ان کا یہ کہنا تھا کہ بنیادی انسانی حقوق کیلئے ابھی پاکستان میں بہت سے اقدامات کی ضرورت ہے۔

انہوں نے کہا کہ نئی حکومت میں انہوں نے سب بڑی تبدیلی وکلا کے حکومت مخالف لانگ مارچ کے دوران محسوس کی۔ حکومت کا رویہ بہت مثبت تھا جبکہ گذشتہ سال جب وکلا نے احتجاج شروع کیا تھا تو مشرف حکومت نے ان کو مارا، پیٹا، گرفتار کے جیلوں میں ڈالا اور انہیں گھروں میں نظربند کر دیا تھا۔

صحافیوں کے مختلف سوالوں کے جواب میں انہوں نے کہا کہ یہ حقیقت ہے کہ پاکستان پر شدت پشندوں کے خلاف آپریشن کرنے کیلئے امریکی دباؤ ہے۔ اور حکومت کی یہ ذمہ داری ہے کہ اگر کوئی قوت انسانی حقوق کی پامالی میں ملوث ہے تو اس کو روکے لیکن اس میں بھی حکومتی اداروں یا فورسز کو کسی صورت میں انسانی حقوق کی خلاف ورزر نہیں کرنی چاہیے۔

ایک اور سوال کے جواب میں مسٹر رتھ نے کہا کہ وہ پہلے دن سے گوانتانامو بے اور سی آئی اے کے ان جیسے دیگر مراکز بند کرنے کا مطالبہ کرتے آئے ہیں۔ان کا یہ بھی کہنا تھا ہیومن رائٹس واچ افغانستان، عراق سمیت امریکہ کے تمام آپریشنز کی مخالفت کرتی ہے۔