عزیزاللہ خان بی بی سی اردو ڈاٹ کام، کوئٹہ

	ہلاک ہونے والوں کے پاؤں بارودی سرنگ پر پڑ گئے تھے

یہ دھماکہ پٹ فیڈر کینال کے قریب آر ڈی دو سو اٹھانوے کے قریب پیش آیا ہے۔ جعفر آباد کے ڈپٹ سپرنٹنڈنٹ پولیس عزیز جاکھرانی نے بتایا ہے کہ دونوں افراد نہر عبور کرکے واپس آ رہے تھے کہ اچانک دھماکہ ہوا ہے۔ انہوں نے کہا کہ ابتدائی اطلاعات کے مطابق بشیر احمد اور فتح دین نامی کے پاؤں بارودی سرنگ پر پڑ گئے تھے جس سے بارودی سرنگ پھٹ گئی۔

انہوں نے کہا ہے کہ ایسی اطلاعات بھی ہیں کہ ان لوگوں کی مقامی قبیلے کے لوگوں سے پرانی دشمنی چلی آرہی ہے لیکن اب تک اس کی تصدیق نہیں ہو سکی کہ یہ واقعہ پرانی دشمنی کا ہے یا وہ انجانے میں بارودی سرنگ سے ٹکرا گئے۔

یاد رہے گزشتہ روز کوئٹہ میں سریاب کے علاقے میں سکریب میں دھماکے سے پانچ بچے ہلاک اور ایک خاتون سمیت پانچ بچے زخمی ہو گئے تھے۔

واضح رہے گزشتہ روز مستونگ شہر میں ایک ڈاکٹر کے گھر کے سامنے دھماکہ ہوا تھا جس سے مکان کی دیواروں کو نقصان پہنچا ہے۔