ہارون رشید، ریاض سہیل بی بی سی اردو ڈاٹ کام، پاکستان

	بجٹ کی منظوری کے بعد ہی آئینی پیکج پر پیش رفت کی توقع کی جاسکتی ہے

توقع ہے کہ دو جون کے اجلاس میں معزول ججوں کی بحالی اور آئین میں ترامیم کے لیے ایک پیکج پیش کیا جائے گا۔

قومی اسمبلی کی جانب سے جاری ایک بیان میں کہا گیا ہے کہ صدر پرویز مشرف نے دو جون شام پانچ بجے اسمبلی کا اجلاس طلب کیا ہے۔

حکومت کا دعویٰ  حکومت معشیت میں استحکام لائے گی۔ سابق حکومت نے ایک طرف تیل اور اشیائے خورد و نوش کی بڑھتی ہوئی قیمت کی صورت میں مہنگائی امپورٹ کی تو دوسری طرف حکومت نے قرضہ لیا، موجودہ حکومت کم سے کم اس قرضے کو فوری ختم کرے گی

ادھر نئے مالی سال کے وفاقی بجٹ کی تیاری میں مصروف وفاقی وزیر سید نوید قمر نے کراچی میں صحافیوں کو بتایا کہ بجٹ سات جون کو اسمبلی میں پیش کر دیا جائے گا۔

نوید قمر نے میڈیا سے بات کرتے ہوئے کہا کہ اس بجٹ میں جو امیر ہیں ان سے ٹیکس وصول کیا جائے گا تاکہ غریبوں پر بوجھ کم کیا جاسکے۔ ان کا کہنا تھا کہ رواں مالی سال کے آخر تک بجٹ خسارہ جی ڈی پی کا نو فیصد ہو جائے گا۔

نوید قمر کا کہنا تھا کہ مالیاتی اداروں اور دیگر ذرائع سے تین ملین ڈالر حاصل کیے جائیں گے جو ملکی بینکوں کے قرضے کی ادائیگی اور خسارے میں بہتری کے لیے کارآمد ثابت ہوں گے۔ ان کا کہنا تھا کہ اس سے ملکی کرنسی کو استحکام ملے گا اور حکومت کو غیر معمولی اقدامات اٹھانا نہیں پڑیں گے جس سے یہاں کی معشیت یا لوگوں کو مشکل حالات سے گزرنا پڑے۔

’اعتماد میں لیں گے‘  سٹاک مارکیٹ میں کیپیٹل گین ٹیکس کے نفاذ کی افواہوں کی وجہ سے سٹاک مارکیٹ مندی کا شکار ہے۔ انہوں نے کہا کہ اگر ٹیکس لگایا گیا تو اس سے قبل ڈائریکٹروں اور سرمایہ کاروں کو اعتماد میں لیا جائے گا نوید قمر

نوید قمر کا کہنا تھا کہ سٹاک مارکیٹ میں کیپیٹل گین ٹیکس کے نفاذ کی افواہوں کی وجہ سے سٹاک مارکیٹ مندی کا شکار ہے۔ انہوں نے کہا کہ اگر ٹیکس لگایا گیا تو اس سے قبل ڈائریکٹروں اور سرمایہ کاروں کو اعتماد میں لیا جائے گا۔

ہفتے کے پہلے روز ہی کراچی سٹاک ایکسچینج کو مندی کا سامنا رہا، سارا دن مارکیٹ میں اتار چڑہاؤ کا رجحان تھا اور ایک وقت یہ مندی ساڑے پانچ سو پوائنٹس تک پہنچ گئی تھی۔

دن کے اختتام پر کے ایس ای ہنڈریڈ انڈکس کا اختتام چار سو انچاس پوائنٹس کی کمی کے ساتھ بارہ ہزار پانچ سو چوراسی پوائنٹس پر ہوا۔

پیر کو دن کے اختتام تک چودہ کروڑ، اڑتیس لاکھ تئیس ہزار روپے کے سودے ہوئے۔
سب سے زیادہ متاثر بینکنگ سیکٹر ہو رہا ہے ، جس کے علاوہ سیمنٹ اور تیل کمپنیوں کے حِصص کی قیمتوں میں بھی کمی دیکھی گئی ہے۔

واضح رہے کہ گزشتہ ہفتے سٹیٹ بینک کی جانب سے شرح سود اور کھاتے داروں کے کھاتوں پر منافع کے اضافے کے بعد سے کراچی سٹاک مارکیٹ شدید مندی کا شکار ہے۔

بجٹ کی منظوری میں کئی ہفتے لگ سکتے ہیں جس کے بعد ہی آئینی پیکج پر کسی پیش رفت کی توقع کی جاسکتی ہے۔