نثار کھوکھر بی بی سی اردو ڈاٹ کام، سکھر

	احتجاج کرنے والےقیدیوں کو گزشتہ پانچ ماہ سے ایک بھی عدالتی شنوائی پر پیش نہیں کیا گیا

جیل سپرنٹڈنٹ ذوالفقار عباس لانگاہ نے بی بی سی کو بتایا ہے کہ احتجاج کرنے والےقیدیوں کو گزشتہ پانچ ماہ سے ایک بھی عدالتی شنوائی پر پیش نہیں کیا گیا تھا۔

احتجاج کرنے والے درجنوں قیدیوں کےمقدمات سکھر سے قریباً ایک سو کلومٹر دور کشمور کندہ کوٹ ضلع کی عدالتوں میں زیرسماعت ہیں۔ قیدیوں کو عدالتوں میں پیش کرنے کی ذمہ داری قانون کےمطابق متعلقہ ضلعی پولیس کی ہوتی ہے۔ جیل حکام کےمطابق کشمور کندہ کوٹ پولیس کو انہوں نے بار ہا قیدیوں کی شنوائیوں کے بارے میں رابطہ کیا مگر پولیس نے قیدیوں کی شنوائی کے لیے کوئی بندوبست نہیں کیا۔

جیل سپرنٹڈنٹ کےمطابق جمعرات کےدن چوبیس قیدیوں کو عدالتی شنوائی کے لیے تیار کیا گیا تھا مگر متعلقہ پولیس کےنہ پہنچنے کی وجہ سے انہیں واپس جیل بیرکوں میں بھیج دیا گیا اور انہوں نے احتجاج کیا۔ جیل حکام کےمطابق قیدیوں کا احتجاج جیل انتظامیہ کےخلاف نہیں بلکہ متعلقہ ضلعی پولیس کے خلاف تھا۔

ڈی آئی جی جیل خانہ جات کرنل ملال نے احتجاج کرنے والے قیدیوں سے ملاقات کی اور انہیں ان کے مطالبات منظور کرنےکی یقین دہائی دلوائی۔

ڈی آئی جی جیل خانہ جات کی یقین دہانی کے بعد قیدیوں نے اپنا احتجاج دو گھنٹوں کے بعد ختم کردیا ہے اور جیل میں حالات معمول پر آچکے ہیں۔