احمد رضا بی بی سی اردو ڈاٹ کام، اسلام آباد

	جہانگیر ترین وزیراعظم شوکت عزیز کی کابینہ میں وفاقی وزیر صنعت و پیداوار رہ چکے ہیں

پیر پگارا کی پاکستان مسلم لیگ فنکشنل کے ٹکٹ پر منتخب ہوکر اسمبلی میں پہنچنے والے جہانگیر ترین نے قومی اسمبلی کی سپیکر سے اس سلسلے میں بدھ کو ایک تحریری درخواست میں کی ہے۔

وہ پرویز مشرف کے دور اقتدار میں سابق وزیراعظم شوکت عزیز کی کابینہ میں وفاقی وزیر صنعت و پیداوار رہ چکے ہیں۔

قومی اسمبلی میں ان کے علاوہ فنکشنل لیگ کے چار دیگر ارکان بھی ہیں جن میں پیر پگارا کے بیٹے پیر صدر الدین شاہ راشدی، خواتین کی مخصوص نشست پر منتخب ہونے والی واحد ہندو خاتون رینا کماری، غلام دستگیر راجڑ، جادم منگریو شامل ہیں۔

صدر الدین شاہ راشدی اپنی جماعت کے واحد رکن قومی اسمبلی ہیں جنہوں نے اب تک حلف نہیں اٹھایا ہے۔ وہ سندھ اسمبلی کے رکن بھی منتخب ہوئے ہیں۔
تحریری درخواست جہانگیر ترین نے اپنے اور رینا کماری، غلام دستگیر راجڑ اور جادم منگریو کے دستخطوں کے ساتھ داخل کی ہے جس میں کہا گیا ہے کہ جہانگیر ترین کو قومی اسمبلی میں ان کی پارٹی نے پارلیمانی لیڈر نامزد کیا ہے اور فنکشنل لیگ کے ارکان حزب اختلاف میں ہیں لیکن مسلم لیگ ق کےارکان کے ساتھ نہیں بیٹھنا چاہتے اس لیے انہیں الگ نشستیں الاٹ کی جائیں۔

اس فیصلے کی وجوہات کے بارے میں جہانگیر ترین نے بی بی سی کو بتایا کہ ’ہم لوگ متحدہ اپوزیشن کے ممبر نہیں ہیں۔ ہم ایشو ٹو ایشو فیصلہ کرتے ہیں اسی لیے ہم نے یہ درخواست دی ہے‘۔

چوہدریوں کے ہمیشہ خلاف تھے  صدر پرویز مشرف کے ساتھ ق لیگ کے پرانے دوست تھے مگر ہم چوہدریوں کے ہمیشہ خلاف تھے پیر صاحب پگارا نے بھی ان کی قیادت کو کبھی تسلیم نہیں کیا جہانگیر ترین

اس سوال پر کہ کیا فنکشنل لیگ جو پرویز مشرف کے ساتھ غیرمشروط تعاون کرتی آرہی ہے اب ان کا ساتھ بھی چھوڑ دے گی؟ انہوں نے کہا کہ ان کی جماعت پرویز مشرف کی اتحادی رہی ہے اور وہ ان کی حمایت جاری رکھے گی۔

نومنتخب وزیراعظم یوسف رضا گیلانی ایک سیاسی جاگیردار پیر گھرانے سے تعلق رکھتے ہیں اور پیر پگارا کے بھانجے ہونے کے ساتھ ساتھ ان کے بیٹے صدر الدین شاہ راشدی کے سمدھی بھی ہیں۔

جہانگیر ترین نے کہا کہ اس امکان کو رد نہیں کیا جاسکتا کہ وہ مستقبل میں یوسف رضا گیلانی کی میرٹ کی بنیاد پر حمایت کریں۔ ’ہم آگے جاکر انہیں سپورٹ کرسکتے ہیں۔ دیکھیں جی اگر انہیں ہماری سپورٹ چاہیے ہوگی کسی ایشو پر تو ہم اس پر غور کریں گے اور اگر ہم سمجھیں گے کہ صحیح ایشو ہے تو سپورٹ بھی کرسکتے ہیں‘۔

انہیں سپورٹ کرسکتے ہیں  آگے جاکر انہیں (یوسف رضا گیلانی) سپورٹ کرسکتے ہیں، اگر انہیں ہماری سپورٹ چاہیے ہوگی کسی ایشو پر، تو ہم اس پر غور کریں گے اور اگر ہم سمجھیں گے کہ صحیح ایشو ہے تو سپورٹ بھی کرسکتے ہیں

دریں اثناء ذرائع کے مطابق مسلم لیگ قاف سے تعلق رکھنے والے صوبہ سندھ کے ضلع ٹھٹھہ سے تعلق رکھنے والے بااثر جاگیردار شیرازی خاندان نے مسلم لیگ نواز میں شمولیت کے لئے کوششیں شروع کردی ہیں۔
شیرازی خاندان پیپلز پارٹی کا سخت مخالف سمجھا جاتا ہے، اس خاندان سے تعلق رکھنے والی سرکردہ سیاسی شخِصیات میں صوبہ سندھ میں نگراں وزیر اعجاز شاہ شیرازی، ان کے بیٹے ایاز شیرازی اور ضلع ناظم ٹھٹہ شفقت شاہ شیرازی شامل ہیں جنہوں نے گزشتہ روز اسلام آباد آکر نواز شریف سے ملاقات کرنے کی کوشش کی تاہم واز شریف نے ان سے ملاقات کرنے سے انکار کردیا۔

مسلم لیگ نون کے ایک رہنما نے نام نہ ظاہر کرنے کی شرط پر بتایا کہ اب شیرازی خاندان کے یہ ارکان مسلم لیگ نون سندھ کے ایک رہنما کی معرفت نواز شریف سے ملاقات کرنے کی کوشش کر رہے ہیں تاہم اب تک انہیں اس میں کامیابی نہیں ہوسکی ہے۔