عبدالحئی کاکڑ بی بی سی اردوڈاٹ کام، پشاور

	طالبان کو ایک فریق سمجھ کر بات چیت کریں گے: نامزد وزیر اعلی

پارلیمانی پارٹی کی جانب سے نامزدگی کے بعد بی بی سی سے بات چیت کرتے ہوئے امیر حیدر خان ہوتی کا کہنا تھا کہ’ طالبان ایک قوت ہیں۔ان کے وجود سے انکار نہیں کیا جاسکتا ہے لہذا انہیں ایک فریق سمجھ کر ان کے ساتھ بات چیت کی جائے گی۔‘

انہوں نے کہا کہ وہ خان عبدالغفار خان کے پیرو کار ہونے کے ناطے سمجھتے ہیں کہ تمام مسائل کا حل مذاکرات کے ذریعے ممکن ہے۔ان کے مطابق’اگر تشدد کا جواب تشدد اور گولی کا جواب گولی سے دیا جائے تو اس کا انجام وہی ہوگا جو آج ہم اپنے علاقوں میں دیکھ رہے ہیں۔‘

امیر حیدرخان ہوتی کے مطابق صوبہ میں امن و امان کا قیام ان کی اولین ترجیح ہے اور اس سلسلے میں وہ تمام فریقین سے بات چیت کرنے لیےتیار ہوں گے۔

اس سوال کے جواب میں کہ کیا سوات یا باقی علاقوں میں سرگرم طالبان کے ساتھ بھی بات چیت ہوسکتی ہے تو انکا کہنا تھا کہ’طالبان کے وجود سے انکار نہیں کیا جاسکتا انہیں ایک حقیقت تسلیم کرتے ہوئے ایک فریق کے طور پر ان کے ساتھ مل بیٹھ کر بات چیت کرنا ہوگی۔انہیں ایک حقیقت نہ سمجھنا غلط سوچ ہے۔‘