ظہیرالدین بابر اسلام آباد، پاکستان

	لاپتہ افراد کا ازخود نوٹس لینے کے بعد ہی مغزول چیف جسٹس افتخار چودھری کے صدر پرویز مشرف کے ساتھ اختلافات شروع ہوئے۔

جمعہ کو اسلام آباد میں ایک پریس کانفرنس سے خطاب کرتے ہوئے ڈیفینس آف ہیومین رائٹس کی سربراہ آمنہ مسعود جنجوعہ نے پاکستان کی نئی فوجی قیادت پر بھی زور دیا کہ وہ آئندہ حکومت کا انتظار کرنے کی بجائے خیر سگالی کے طور پر ایجنسیوں کی حراست میں موجود افراد کو رہا کر دیں تاکہ عوام میں فوج کی ساکھ پھر سے بہتر ہو سکے۔

اس موقع پر لاپتہ افراد کا مقدمہ لڑنے والے وکیل خالد خواجہ اور دو لاپتہ اشخاص ڈاکٹر عابد شریف اور منظور مہدی کے اہل خانہ بھی موجود تھے۔ اس غیر سرکاری تنظیم کی سربراہ آمنہ مسعود جنجوعہ کے شوہر ڈاکٹر مسعود جنجوعہ بھی تین سال سے پراسرار طور پر غائب ہیں۔

آمنہ مسعود نے حکومت کے لیے نو منتخب سیاسی جماعتوں کو مبارکباد دی اور ان سے اپیل کی کہ لاپتہ افراد کا مسئلہ ان کی حکومت کے ایجنڈے میں اتنا ہی اہم ہونا چاہیے جتنا کہ معذول ججوں کی بحالی کا ہے۔

دو ہزار چھ میں لاپتہ افراد کا ازخود نوٹس لینے کے بعد ہی معزول چیف جسٹس افتخار چودھری کے صدر جنرل پرویز مشرف کے ساتھ اختلافات شروع ہوئے جس کے بعد پورا ملک، وکلاء، سول سوسائٹی اور سیاسی جماعتوں کی حکومت مخالف تحریکوں کی زد میں آ گیا۔

آمنہ مسعود کا کہنا تھا کہ آئندہ قومی اسمبلی کو لاپتہ افراد کی بازیابی، مستقبل میں ایسے واقعات کی روک تھام اور جاسوسی اداروں کے ان لوگوں کو کیفرِ کردار تک پہنچانا چاہیے جو دہشت گردی کے خلاف امریکی جنگ کی آڑ میں پاکستانی خاندانوں کو تکالیف پہنچا رہے ہیں۔

انہوں نے بتایا کہ پاکستان مسلم لیگ نواز کے قائد نواز شریف نے لاہور میں اپنی رہائش گاہ پر لاپتہ افراد کے لواحقین کو دعوت دے کر انہیں یقین دہانی کرائی ہے کہ وہ اقتدار میں آنے کے بعد ایجنیسیوں کی حراست میں موجود تمام لوگوں کو رہا کروائیں گے۔

آمنہ مسعود کا مطالبہ تھا کہ پاکستان پیپلز پارٹی اور عوامی نیشنل پارٹی کو بھی لاپتہ افراد کے خاندانوں کے دکھ کو نظر انداز نہیں کرنا چاہیے۔

اس موقع پر لاپتہ افراد کے وکیل خالد خواجہ نے کہا کہ اگر آئندہ حکومت نے لاپتہ افراد کو بازیاب نہ کروایا تو وہ پہلے کی طرح اب بھی اس مسئلے کو بین الاقوامی سطح پر اٹھائیں گے اور عالمی عدالتِ انصاف کا دروازہ کھٹکھٹائیں گے۔