انتخاب امیر بی بی سی اردو ڈاٹ کام ، پشاور

	محمد صادق کو رات گئے رہا کیا گیا

مولانا صادق کے صاحزادے سینیٹر حافظ رشید احمد نے بی بی سی کے رابطہ کرنے پر مولانا صادق کی رہائی کی تصدیق کرتے ہوئے کہا کہ اُن کی رہائی رات تین بجے عمل میں آئی جب اُن کا فون آیا اور اُنہوں نے کہا کہ ’آ کر مجھے گھر لے جاؤ۔‘

مولانا محمد صادق کو اٹھارہ دسمبر کو مہمند ایجنسی کے علاقے آنبار سے واپس آتے ہوئے ایجنسی ہی کے علاقے گڑنگ میں نامعلوم مسلح افراد نے اُس وقت اُن کی گاڑی روک کر اغواء کرلیا جب اُن کے ساتھ اُن کے باڈی گارڈز بھی موجود تھے۔

مولانا صادق محمد کو، جو کہ آئندہ عام انتخابات میں مہمند ایجنسی سے قومی اسمبلی کی نشست این اے چھتیس کے لیے ایک بار پھر امیدوار ہیں، مہمند ایجنسی کے علاقے گنڈاؤ کے بازار میاں منڈی میں رات کی تاریکی میں رہا کیا گیا۔

اُن کے بیٹے سینیٹر حافظ رشید احمد نے بتایا کہ رہائی کے وقت مولانا صادق کے کپڑے اس قدر گندے تھے جس سے اندازہ ہوتا ہے کہ اُن کو نہایت گندی جگہ پر رکھا گیا تھا۔

تاہم حافظ رشید نے مولانا صادق کے اغواء کیے جانے سے لے کر اُن کی رہائی تک کے دوران رونما ہونے والے واقعات کی تفصیل بتانے سے معذوری ظاہر کرتے ہوئے کہا کہ ’ اُن کی ذہنی کیفیت ایسی نہیں کہ وہ ہمیں کچھ بتا سکیں یا میڈیا سے بات کرسکیں۔‘

البتہ اُنہوں نے کہا کہ مولانا کو تاوان ادا کیے بغیر ہی رہا کیا گیا ہے ۔ ’ہم نے کسی کو پیسے نہیں دیے۔‘