ذوالفقار علی بی بی سی، اردو ڈاٹ کام، اسلام آباد

	سومرو کی سیاسی زندگی کا آغاز سندھ کے گونر کی حیثیت سے ہوا

میاں محمد سومرو انیس اگست انیسں سو پچاس میں پیدا ہوئے۔ انہوں نے فورمین کرسچن کالج سے بی ایس سی کی ڈگری امیتازی پوزیشن کے ساتھ حاصل کی اور پنجاب یونیورسٹی سے ایم ایس سی فزکس کی ڈگری حاصل کی اور اس کے بعد انہوں نے امریکہ سے آپریشنز منیجمنٹ میں ماسڑز کیا۔

سومرو ایک بینکار ہیں اور سیاست میں قدم رکھنے سے پہلے وہ ملک میں اور بیرون ملک مختلف ملکی اور غیر ملکی بینکوں میں اہم عہدوں پر فائز رہے۔

وہ انٹرنیشنل بینک آف یمن میں جنرل مینجر اور چیف ایگزیکٹیو آفیسر کے طور پر کام کر چکے ہیں۔

وہ فیصل اسلامک بینک آف بحرین ، بینک آف امریکہ میں بھی اہم عہدوں پر فائز رہے۔

اس کے علاوہ انہوں نے پاکستان کے مختلف بینکوں جن میں مسلم کمرشل بینک فیڈرل بینک آف کا آپریٹوز اور زرعی ترقی بینک میں اہم عہدوں پر خدمات انجام دیں اور نیشنل بینک کے صدر بھی رہے۔

جنرل پرویز مشرف نے ان کو مئی سن دو ہزار میں سندھ کا گورنر تعنات کیا اور یہاں سے ہی ان کی سیاسی زندگی کا آغاز ہوتا ہے اور انہوں نے سینٹ کے رکن کی انتخاب لڑنے کے لئے دسمبر دو ہزار دو میں گورنر کے عہدے سے استفیٰ دیا۔

میاں محمد سومرو چوبیس فروری سن دو ہزار تین میں سینیٹر منتخب ہوئے اور بارہ مارچ سن دو ہزار تین میں وہ سینٹ کے چیئرمین منتخب ہوئے۔

کئی لوگوں کا خیال یہ ہے کہ صدر جنرل پرویز مشرف چاہتے تھے کہ کوئی ایسا شخص چیئرمین سینیٹ ہو جس کے سیاسی عزائم نہ ہو کیوں کہ ان کے بیرون ممالک دوروں کے دوران چیئرمین سینیٹ ہی قائم مقام صدر کے فرائض انجام دیتا ہے۔

یوں سومرو جنرل پرویز مشرف کے معیار پر پورا اترتے تھے اور ان کو چیئرمین سینیٹ منتخب کیا جاتا ہے۔

ان کے بارے میں کہا جاتا ہے کہ وہ دھیمے اور ٹھنڈے مزاج کے انسان ہیں اور انہوں نے سینیٹ کی کارروائی کے دوران انتہائی تحمل مزاجی کا مظاہرہ کیا حالانکہ پاکستان کی سیاست میں خاصی گرما گرمی رہی۔

میاں محمد سومرو سیاسی بیان بازی سے گریز کیا اور بہت کم سیاسی بیان دیے اس کی وجہ شاہد یہ بھی تھی کہ ان کے چند ایک بیانات متنازعہ بنے تھے۔