عبادالحق بی بی سی اردو ڈاٹ کام، لاہور

	وکلاء کے خلاف انسدادِ دہشت گردی ایکٹ اور سولہ ایم پی او سمیت دیگر الزامات میں مقدمہ درج کیا گیا ہے

عدالت نے ایک معمر وکیل سلمان کے علاوہ لاہور ہائی کورٹ بار کی نائب صدر فردوس بٹ، فنانس سیکرٹری روبی حیات اعوان اور عابدہ چودھری ایڈووکیٹ کو کو ضمانت پررہا کرنے کا حکم دیا ہے۔

اس سے قبل منگل کو لاہور پولیس نے وکلاء رہنماؤں سمیت ساڑھے تین سو وکلاء کے خلاف انسدادِ دہشت گردی ایکٹ اور سولہ ایم پی او سمیت دیگر الزامات میں مقدمہ درج کیا تھا۔

پولیس نےسوموار کو وکلاء کی طرف سے ملک میں ایمرجنسی کے نفاذ اور پی سی او کے اجراء کے خلاف احتجاج کرتے ہوئے جلوس نکالنے کی کوشش کی تھی جس پر پولیس نے وکلاء پر لاٹھی چارج کیا اور آنسو گیس کی شیلنگ کی تھی۔

پولیس نے اس موقع پر سینکڑوں وکلاء کو گرفتار کرلیا تھا جن میں خواتین وکلاء بھی شامل ہیں۔

تھانہ پرانی انارکلی کے ایس ایچ او کی درخواست پر پاکستان بارکونسل کے رکن رمضان چودھری، لاہور ہائی کورٹ بار کے تین عہدیداروں فردوس بٹ، سرفراز چیمہ، روبی حیات اعوان ، سابق صدر لاہور ہائی کورٹ بار احمد اویس سمیت تین سوچوالیس وکلاء پر انسداد دہشتگردی کی دفعہ سات اے کے علاوہ دیگر دفعات کے تحت مقدمہ درج کیا ہے۔

مقدمہ میں یہ الزام عائد کیا گیا ہے کہ وکلاء نے پولیس ملازمین کو زد وکوب کیا ،سڑک بلاک کر کے حکومت کے خلاف شرانگیز نعری بازی کی، سرکاری املاک کو نقصان پہنچایا اور عوام میں خوف وہراس پھیلا کر پولیس ملازمین پر جان الیوا حملے کرکے ان کو شدید زخمی کیا ہے۔

قبل ازیں منگل کو لاہور ہائی کورٹ کے ایک اور جج جسٹس شیخ جاوید سرفراز نے عبوری آئینی حکم کے تحت اپنے عہدے کا حلف اٹھایا۔

چیف جسٹس لاہور ہائی کورٹ مسٹرجسٹس افتخار حسین چودھری نے ان سے حلف لیا ۔جسٹس شیخ جاوید سرفراز کے حلف اٹھانے کےبعد لاہور ہائی کورٹ میں ججوں کی تعداد اٹھارہ ہوگئی ہے۔

ملک میں ہنگامی حالت کے اعلان اور پی سی او یعنی عبوری آئینی حکم کے اجرا کے وقت لاہور ہائی کورٹ میں ججوں کی کل تعداد اکتیس تھی جبکہ تیرہ ججوں نے پی سی او کے تحت حلف نہیں اٹھایا تھا۔

لاہور ہائی کورٹ میں جسٹس شیخ جاوید سرفراز کے حلف اٹھانے کی تقریب میں ہائی کورٹ کے ججوں اور سرکاری وکلاء نے شرکت کی اور اس تقریب کی کوریج کے لیے صرف سرکاری میڈیا کو مدعو کیا گیا تھا۔