بیورو رپورٹ، اسلام آباد

	بھارت نے اجمیر اور لدھیانہ میں ہونے والے بم دھماکوں کا الزام آئی ایس آئی پر عائد کیا تھا

جمعرات کو دفتر خارجہ کی طرف سے جاری ہونے والے ایک بیان میں کہا گیا ہے کہ ہندوستانی حکام کو بھارت میں ہونے والے کسی بھی ناخوشگوار واقعے پر ایسے بے بنیاد الزامات لگانے کی عادت پڑ چکی ہے۔

دفتر خارجہ کے بیان میں ان بھارتی الزامات کی بھی تردید کی گئی ہے کہ پاکستان شدت پسند سکھوں کو منظم کرنے کی کوئی کوشش کر رہا ہے۔

بیان میں مزید کہا گیا ہے کہ اس قسم کے الزامات لگانے کا یہ انتہائی نامناسب وقت ہے ، خاص طور پر اس وقت جب آج سے نئی دہلی میں باہمی اعتماد سازی کے اقدامات سے متعلق دوطرفہ مذاکرات شروع ہو رہے ہیں ۔ اس بیان سے دفتر خارجہ کے بقول ، ماحول پر برا اثر پڑ سکتا ہے ۔

بھارت کے قومی سلامتی کے مشیر ایم کے نارائن نے ایک بیان میں پاکستانی خفیہ ایجنسی آئی ایس آئی پر ہندوستان میں ہونے والے بم دھماکوں میں ملوث ہونے اور بھارتی ریاست پنجاب میں سکھ شدت پسندی کو فروغ دینے کا الزام لگایا تھا۔