ہارون رشید بی بی سی اردو ڈاٹ کام، راولپنڈی

	یہ بات کافی تعجب خیز ہے کہ حملہ آور بس کے اندر کیسے داخل ہو گیا

قاسم مارکیٹ میں بس کو نشانہ بنانے والوں نے کافی ہوم ورک کیا ہوگا۔ انہوں نے اس پر کئی دنوں سے نظر رکھی ہوگی اور اس کا روٹ بھی دیکھا ہوگا۔

راولپنڈی کینٹ میں بم دھماکے

ایک قابل توجہ چیز بس کے قریب ایک ہیلمٹ تھا جو اکثر موٹر سائیکل سوار ہی پہنتے ہیں۔ موقع پر موجود بعض سکیورٹی اہلکاروں کا خیال تھا کہ ممکن ہے خودکش حملہ آور نے خود کو بس سے ٹکرا دیا ہو۔ لیکن اس موقف کوجائے وقوع پر موٹر سائیکل کا نہ ہونا کمزور کرتا ہے۔ اگر اس حملے میں موٹر سائیکل استعمال ہوئی تو اس کا ایک پرزہ بھی وہاں موجود نہیں تھا۔ کیا وہ مکمل طور پر تباہ ہوئی؟

	حکومت اسے وزارت دفاع کی بس بتاتی ہے تاہم کئی لوگوں کا کہنا ہے کہ یہ ایک خفیہ ادارے کی بس تھی

عینی شاہدین کا کہنا تھا کہ بس رکی اور چند لوگ جب اس میں بیٹھنے لگے تو دھماکہ ہوا۔ شاید مبینہ خودکش حملہ آور نے اس وقت بس میں داخل ہو کر دھماکہ کر دیا ہو؟

آر اے بازار کا دھماکہ پہلے سے بھی زیادہ مبہم ہے۔ وہاں تو نہ موٹر سائیکل ہے نہ کوئی گڑھا۔ کوئی اسے موٹر سائیکل سوار خودکش حملہ قرار دے رہا ہے تو کچھ اسے پیدل شخص کی کارروائی مان رہے ہیں۔ موقع پر موجود اکثر لوگ تاہم صرف اتنا بتا سکتے ہیں کہ دھماکہ بڑا زور دار تھا۔ یہ کیسے ہوا، انہیں معلوم نہیں۔

قاسم مارکیٹ دھماکے کا ہدف تو بھری بس تھی جس میں زیادہ جانی نقصان کا احتمال تھا ہی لیکن اس کے مقابلے میں آر اے بازار والے دھماکے کا مقصد بھی شاید یہی تھا کہ اس سے بھی زیادہ سے زیادہ جانی نقصان ہو۔ اس میں دھماکے خیز مواد کے علاوہ چھرے بھی استعمال کیے گئے۔ بعض تباہ شدہ گاڑیوں سے ایسا محسوس ہوتا تھا جیسے ان پر کلاشنکوف سے گولیاں برسائی گئی ہوں۔

ان چھروں کی وجہ سے ہی قریبی دکان پر بیٹھے چند تاجر بھی ہلاک و زخمی ہوئے۔

	تباہ شدہ گاڑیوں سے ایسا محسوس ہوتا تھا جیسے ان پر کلاشنکوف سے گولی چلائی گئی ہو

قبائلی علاقے جنوبی وزیرستان میں پہلے ہی شدت پسند سینکڑوں سکیورٹی اہلکاروں کو یرغمال بنائے ہوئے ہیں۔ وہاں فوج پہلے ہی دباؤ میں ہے۔مزید دباؤ بڑھانے کی کیا ضرورت ہے؟

لال مسجد کے خلاف فوجی کارروائی کے فوراً بعد اس کا بظاہر ردعمل تو اسلام آباد میں دو خودکش حملوں کی صورت میں آ چکا تھا۔ اب کافی عرصے کے بعد اس مسئلے پر کیوں مزید حملے کیوں کرے گا؟

اس کے بعد رہ جاتی ہے ملکی سیاسی صورتحال۔ صدر جنرل پرویز مشرف اپنے دوبارہ انتخاب کی بابت کافی تنگ گلی میں پھنسے ہوئے ہیں۔ انہیں نہ تو پیپلز پارٹی اور نہ ہی ایم ایم اے فی الحال نکلنے کا کوئی راستہ دے رہی ہے۔ بعض لوگ پوچھتے ہیں کہ کیا سکیورٹی کی مخدوش صورتحال کو وجہ بنا کر ایمرجنسی کی راہ تو ہموار نہیں کی جا رہی؟