نیعمہ احمد مہجور بی بی سی اردو ڈاٹ کام لندن

	لاکھوں مہاجرین نے ہزاروں میل پیدل ہجرت کی

مشہور مؤرخ ایئن ٹیلبٹ لکھتے ہیں کہ پاکستان اسلام کی بنیاد پر بنا مگر یہ ملک اب تک حقیقت میں نہ اسلامی مملکت بنا اور نہ یہاں سیکولرازم کی جڑیں ہی پیوست ہوئیں۔

پاکستان کی بیشتر خواتین سمجھتی ہیں کہ کروڑوں مسلمانوں نے جس مملکت کا خواب دیکھا تھا وہ اب تک شرمندۂ تعبیر نہیں ہوا بلکہ ساٹھ برس گزر جانے کے بعد بھی ملک یہ تعین نہیں کرسکا کہ وہ کس طرح کا نظام چاہتا ہے۔

کراچی کی بزرگ خاتون فاطمہ بی بی نے سینتالیس میں آگرہ سے ہزاروں خاندانوں کے ہمراہ ہجرت کی وہ کہتی ہیں کہ انہوں نے نہ صرف اپنے عزیز و اقارب کو آگرہ میں چھوڑا بلکہ ماں سے چیزیں چرانے کی عادت سے بھی چھٹکارہ پایا کیونکہ پاکستان کا مطلب پاک و صاف سرزمین کے طور پر لیا جانے لگا تھا۔

	قرار داد پاکستان لاہور میں انیس سو چالیس میں پیش کی گئی

فاطمہ بی بی کہتی ہیں کچھ سال بعد ہی پاکستان میں انتشار کی کیفیت پیدا ہوئی اور اسلام محض ایک نعرہ بن گیا۔

سیکولر خیالات کی خواتین سمجھتیں ہیں کہ بانی پاکستان نے اسلام کی بنیاد پر ملک بنایا مگر انہوں نے سیکولر روایات پر چلنے کی تاکید بھی کی۔

رام پور بھارت کی رشیدہ خاتون کا جواب کراچی میں آباد ہیں کہنا ہے کہ مدینے کے بعد دوسری مقدس جگہ پاکستان بنا مگر یہاں کے عوام نے اس کی قدر نہیں کی بلکہ اسلام اورسیکولرازم کی بحث میں اس ملک کے وسائل کو برباد کیا۔

	ہندوستان کی تقسیم کا منصوبہ جلد بازی میں بنایا گیا

جماعت اسلامی سے وابستہ کئی خواتین نے مجھے بتایا کہ اگر نفاذ شریعت کے لیے طاقت کا استعمال بھی کرنا پڑا تو وہ اس سے اجتناب نہیں کریں گی کیونکہ پاکستانی معاشرے میں بڑے پیمانے پر بے راہ روی اور مغربیت بڑھتی جا رہی ہے۔

پاکستان کی پڑھی لکھی نئی نسل سے وابستہ لڑکیاں اس زور زبردستی کو مسترد کرتی ہیں اور وہ اپنے اوپر کوئی بھی پالیسی مسلط نہیں دیکھنا چاہتی۔ تاہم کوئی نہیں کہہ سکتا کہ اسلام اور سیکوالرزم کے درمیان یہ بحث اگلے ساٹھ برسوں میں کیا رنگ لائے گی۔