ریاض سہیل بی بی سی اردو ڈاٹ کام، کراچی

	بھاری گاڑیاں اب رات گیارہ بجے کے بعد شہر میں داخل ہو سکیں گی

کراچی میں گاڑیوں کی بڑھتی ہوئی تعداد، ٹوٹی پھوٹی سڑکوں اور سڑکوں کی مرمت کے کام کی وجہ سے شاہراہ فیصل اور ایم اے جناح روڈ سمیت تمام مرکزی شاہراوں پر ٹریفک جام ایک معمول بن گیا ہے اور سپریم کورٹ کے جسٹس نواز عباسی نے گزشتہ ہفتے ان واقعات کا از خود نوٹس لیا تھا۔

کراچی میں سپریم کورٹ میں جمعہ کی صبح جسٹس بھگوان داس اور جسٹس نواز عباسی نے شہر میں جاری ٹریفک کے مسائل کی شکایت کی سماعت کی۔سماعت کے موقع پر عدالت میں سیکرٹری ٹرانسپورٹ اور ڈی آئی جی ٹریفک پیش ہوئے تاہم سٹی ناظم مصطفیٰ کمال غیرحاضر رہے ۔

جسٹس بھگوان داس نے ریمارکس دیتے ہوئے کہا کہ سٹی ناظم عدالت میں پیش ہونے سے کیوں شرماتے رہے ہیں اور ان کی غیرحاضری توہینِ عدالت کے زمرے میں بھی آ سکتی ہے۔

عدالت نے سٹی ناظم ، سیکرٹری ٹرانسپورٹ اور ڈی آئی جی ٹریفک کو ہدایت کی کہ وہ اکیس اگست کو ٹریفک کے مسائل کے حل کے لیے قابلِ عمل تجاویز پیش کریں۔

عدالت نے دن کے وقت شہر میں بھاری گاڑیوں کی آمد پر پابندی عائد کرنے کا حکم جاری کیا اور ہدایت کی کہ اس قسم کی گاڑیوں کو رات گیارہ بجے کے بعد شہر میں داخلے کی اجازت دی جائے۔

یاد رہے کہ بدھ کو سماعت کے موقع پر ڈی آئی جی ٹریفک واجد درانی نے عدالت کو بتایا تھا کہ شہر میں کئی سڑکیں ٹوٹی ہوئی ہیں اور شہری حکومت کے ادارے پولیس سے تعاون نہیں کرتے اور یہی ٹریفک جام کی وجہ ہے۔