آصف فاروقی بی بی سی اردوڈاٹ کام، اسلام آباد

	صدارتی ریفرنس کی تیاری میں شامل کسی فرد کے خلاف کوئی کارروائی نہیں کی گئی: لطیف کھوسہ

سینیٹ کے انتالیسویں اجلاس کے پہلے دن وقفۂ سوالات کے بعد سینیٹر لطیف کھوسہ ایڈووکیٹ نے نکتۂ اعتراض پر کہا کہ چیف جسٹس کے خلاف صدارتی ریفرنس عدالت میں جھوٹا ثابت ہو گیا ہے لیکن اس ریفرنس کی تیاری میں شامل کسی فرد کے خلاف حکومت نے کوئی کارروائی نہیں کی۔

لطیف کھوسہ نے کہا کہ ملک کے چیف جسٹس کے خلاف ریفرنس میں سرکاری اہلکاروں نے جھوٹے الزامات لگائے اور اس کے بعد انٹیلیجنس ایجنسیوں کے سربراہان نے عدالت میں دائر بیان حلفی میں الزامات عائد کیے، عدالتی فیصلے کے بعد وہ بھی جھوٹے ثابت ہو چکے ہیں۔ لیکن ان میں سے کسی کے خلاف کوئی کارروائی نہیں کی گئی۔ انہوں نے کہا کہ ساڑھے چار ماہ تک عدالتوں میں کوئی کام نہیں ہوا اور پوری قوم ایک اضطراری کیفیت کا شکار رہی لیکن کسی پر اس کی ذمہ داری عائد نہیں کی گئی۔

سینیٹ میں قائد حزب اختلاف اور پیپلز پارٹی کے سینیٹر رضا ربانی نے کہا کہ چیف جسٹس کی بحالی کی تحریک کے دوران کئی قیمتی جانیں بھی ضائع ہوئیں۔ صدر جنرل مشرف نے بارہ مئی کے واقعات کی بھی تحقیقات سے انکار کیا۔ رضا ربانی نے کہا کہ حکومت کی اس بے حسی کے خلاف وہ اور ان کی حلیف جماعتوں کے ارکان ایوان سے احتجاجا ٹوکن واک آؤٹ کر رہے ہیں۔

اس اعلان کے ساتھ ہی حزب اختلاف کے تمام ارکان ایوان سے باہر چلے گئے۔