احمدرضا بی بی سی اردو ڈاٹ کام، کراچی

	نعمت اللہ نے سندھ ہائی کورٹ خود یہ آئینی درخواست جمع کروائی

یہ درخواست شہر کے سابق ناظم اعلیٰ نعمت اللہ خان نے داخل کی ہے جس میں انہوں نے صوبائی حکومت پر سرکاری محکموں میں سیاسی بنیادوں پر بھرتیاں کرنے کا الزام لگایا ہے اور عدالت سے استدعا کی ہے کہ ان بھرتیوں کو غیرقانونی قرار دیا جائے۔

درخواست میں صوبے کے چیف سیکریٹری، سیکریٹری تعلیم اور سیکریٹری داخلہ کو جوابدہ بنایا گیا ہے۔ جمعہ کو ہائی کورٹ کے جسٹس مشیر عالم اور جسٹس ضیاء پرویز پر مشتمل ڈویژن بینچ نے درخواست کی سماعت کی اور مذکورہ حکام کو نوٹس جاری کرتے ہوئے جواب طلب کیا ہے۔

درخواست گذار نے الزام عائد کیا ہے کہ حکمران اتحاد میں شامل جماعتوں نے سرکاری نوکریوں کی بندربانٹ کرلی ہے اور وہ سرکاری محکموں میں بھرتی پر پابندی کے باوجود اپنے من پسند افراد کو خلاف قانون ملازمتیں دے رہی ہیں جس سے اہل افراد نظر انداز ہورہے ہیں اور کراچی سمیت صوبے کے عوام میں سخت بے چینی اور مایوسی پائی جاتی ہے۔

درخواست گذار کا کہنا ہے کہ غیرقانونی طور پر بھرتی ہونے والے افراد اپنی ڈیوٹیوں سے غیرحاضر رہتے ہیں اور مفت کی تنخواہیں لے رہے ہیں جس سے سرکاری کام کا بھی ہرج ہورہا ہے۔

انہوں نے بعض اخبارات میں شائع ہونے والی خبروں کے تراشے بھی دئے ہیں جن میں دعوی کیا گیا ہے کہ حکمران جماعت مسلم لیگ (ق) اور متحدہ قومی موومینٹ کو مبینہ طور پر صوبے کی سرکاری ملازمتوں میں پچاس پچاس فیصد کوٹہ دیا گیا ہے۔ ان کا کہنا ہے کہ اس طرح حکمران جماعتوں کے لئے سرکاری ملازمتوں کا کوٹہ مخصوص کرنا آئین و قانون کی خلاف ورزی ہے۔

درخواست گذار نے استدعا کی ہے کہ عدالت چیف سیکریٹری سے پچھلے پانچ سالوں کے دوران ہونے والی سرکاری بھرتیوں کی تفصیلات طلب کرے اور سیاسی بنیادوں پر ہونے والی بھرتیوں کو غیرقانونی قرار دے۔ انہوں نے ایسی مبینہ بھرتیوں میں ملوث افراد کے خلاف قانونی کارروائی کی بھی درخواست کی ہے۔