یہ چاروں افراد ملا عمر کے انتہائی نزدیک تھے

اسلام آباد سے ہمارے نامہ نگار انتخاب امیر صدیقی نے کہا کہ وفاقی وزیر ِ داخلہ آفتاب احمد شیرپاؤ اور سیکریٹری داخلہ سید کمال شاہ نے کوئٹہ سے طالبان کے چار سینیئر رہنماؤں کی گرفتاری کی خبر کی توثیق یا تردید کرنے سے اجتناب کیا ہے۔

اتوار کی شام اسلام آباد میں پریس کانفرنس کے بعد بی بی سی کے ایک سوال کے جواب میں آفتاب شیرپاؤ نے کہا کہ اُنہیں اس بارے میں کوئی اطلاع نہیں۔

اسی طرح سیکریٹری داخلہ سےجب پوچھا کہ کیا طالبان کے رہنما گرفتار کئے گئے ہیں تو اُنہوں نے کہا کہ اس اطلاع کی سچائی کو جاننے کی ضرورت ہے۔ اُن کا کہنا تھا کہ کو ئٹہ میں چیک پوسٹوں پر گرفتاریوں کا سلسلہ روزانہ کا معمول ہے لیکن پھر بھی اس خبر کی سچائی کو جاننے کی ضرورت ہےالبتہ اُنہوں نےطالبان رہنماءملاعمر کے قریبی رفقاء کی گرفتاری سے متعلق خبر کی دوٹوک الفاظ میں تردید نہیں کی۔

بی بی سی کو ملنے والی اطلاعات کے مطابق گرفتارشدگان میں ملا عمر کی خط و کتابت اور رابطے کے ذمہ دار ملا جہانگیر اور ملا معید بھی شامل ہیں۔

ان کے علاوہ جن افراد کوگرفتار کیا گیا ہے ان میں افغان صوبے ارزگان کے طالبان کمانڈر ملا نذیر اور کابل میں طالبان کے کمانڈر ملا طاہر شامل ہیں۔افغان تجزیہ کاروں کا کہنا ہے کہ یہ چاروں افراد ملا عمر کے انتہائی نزدیک تھے۔

یاد رہے کہ گزشتہ ایک برس کے دوران سرحد پار کارروائیوں کے حوالے سے پاکستان اور افغانستان کے باہمی تعلقات کشیدگی کا شکار رہے ہیں اور کچھ سینئر افغان حکام پاکستان پر طالبان کو اپنی سرزمین استعمال کرنے کی اجازت دینے کا الزام بھی لگاتے رہے ہیں۔