عبدالحئی کاکڑ بی بی سی اردوڈاٹ کام، پشاور

	پیر صبح چار بجے طورخم کے مقام باشامینہ میں واقغ ایک چھوٹی پہاڑی سے دو میزائل فائر کیے گئے

پاکستان کے قبائلی علاقے خیبر ایجنسی کے پولٹیکل حکام نے بی بی سی کو بتایا کہ پیر کی علی الصبح چار بجے پاکستانی علاقے طورخم کے مقام باشامینہ میں واقغ ایک چھوٹی پہاڑی سے دو میزائلوں کو فائر کیا گیا ہے جس میں وہاں کھڑے دس آئل ٹینکر مکمل طور پر تباہ ہوگئے ہیں تاہم کسی قسم کا جانی نقصان نہیں ہوا ہے اور آگ پر بھی قابو پا لیا گیا ہے۔

حکام کے بقول حملوں کے فوراً بعد پشاور سے میزائل ڈسپوزل سکوائڈ کی ایک ٹیم جائے وقوعہ پر پہنچ گئی جنہوں نے وہاں پر نصب تین میزائلوں کو ناکارہ بنادیا۔ان کے مطابق روسی ساخت کے ان میزائلوں کو ریموٹ کنٹرول کے ذریعےسے چلایا گیا تھا۔ حملوں کے بعد طورخم بارڈ کو بند نہیں کیا گیا ہے اور گاڑیوں کی آمد و رفت معمول کے مطابق جاری ہے۔

پولٹیکل انتظامیہ نے تاحال اس سلسلے میں کسی قسم کی گرفتاری نہیں کی گئی ہے اور نہ ہی کسی کو ذمہ دار ٹھہرایا گیا ہے۔

واضح رہے کہ پاکستان کے طورخم بارڈر کے راستےافغانستان میں تعینات اتحادی افواج کے لیے تیل کی ترسیل کرنے والی گاڑیوں کو ماضی میں بھی بارہا پر اسرار دھماکوں کا نشانہ بنایا گیا تھا لیکن آئل ٹینکرز کو میزائل حملوں کا نشانہ بنائے جانا اپنی نوعیت کا یہ شاید پہلا واقعہ ہے۔

طورخم پاکستان اور افغانستان کے درمیان ایک اہم تجارتی راستہ ہے اور پاکستان سے روزانہ درجنوں گاڑیاں افغانستان میں مقیم اتحادی افواج کے لیے روزمرہ اشیاء کے علاوہ تیل کی ترسیل کرتی ہیں۔