ریاض سہیل بی بی سی اردو ڈاٹ کام، کراچی

	متاثرہ طیارے کو فی الحال گراونڈ کر دیا گیا ہے (فائل فوٹو)

پاکستان انٹرنیشنل ایئر لائینز کے ایک بیان کے مطابق منگل کی صبح پی آئی اے کی پرواز پی کے تین سو چالیس کراچی سے فیصل آباد کے لئے روانہ ہوئی تو خودکار پائلٹ نظام میں فنی خرابی کے باعث پائلٹ نے جہاز کو واپس اتارنے کا فیصلہ کیا۔

بیان کے مطابق جہاز کے اچانک بریک لگانے سے سخت حرارت پیدا ہوئی اور تین ٹائر پھٹ گئے ۔ تاہم کسی مسافر یا عملے کو کوئی چوٹ نہیں آئی۔

فیصل آباد جانے والے مسافروں کو ایک دوسری پرواز کے ذریعے روانہ کیا گیا جبکہ متاثرہ طیارے کو فی الحال گراونڈ کر دیا گیا ہے اور اسے سول ایوی ایشن اتھارٹی کی کلیئرنس کے بغیر استعمال نہیں کیا جائے گا۔

پی آئی اے کے مطابق واقعے کی تحقیقات کی جارہی ہے۔

پانچ روز قبل کراچی ایئرپورٹ پر ہی پی آئی اے کے دو طیارے صفائی والے ایریا میں آپس میں ٹکرا گئے تھے، جس سے ایک طیارہ کو نقصان پہنچا تھا۔

گزشتہ ماہ یورپی یونین نے پی آئی اے کے حفاظتی انتظامات پر تحفظات ظاہر کرتے ہوئے یورپ میں اس کے کئی طیاروں پر پابندی عائد کر دی تھی۔

پی آئی اے کے چیئرمین طارق کرمانی نے استعفیٰ دے دیا تھا جس کے بعد کراچی سٹاک ایکسچینج کے چیئرمین ظفر اے خان کو ادارے کا چیئرمین مقرر کیا گیا ہے۔