رفعت اللہ اورکزئی بی بی سی اردو ڈاٹ کام، پشاور

	’اگلی حکومت بے نظیر بھٹو کو دی گئی تو یہ پاکستان ٹوٹنے کا سبب بنے گا‘

اعلامیہ میں ان کاروائیوں کو خلاف شریعت اور دینی مدارس کے خلاف سازش قرار دیا گیا ہے۔

اوقاف ہال پشاور میں منگل کو منعقد ہونے والے اس کنونشن میں صوبہ سرحد اور قبائلی علاقوں سے تعلق رکھنے والے سینکڑوں علماء، مفتیان اور دینی مدارس کے طلباء نے کثیر تعداد میں شرکت کی۔

کنونشن میں جمعیت علماء اسلام کے مرکزی صدر اور قومی اسمبلی میں قائد حزب اختلاف مولانا فضل الرحمان ، وزیراعلی سرحد اکرم خان درانی، وفاق المدارس کے چئیرمین مولانا سلیم اللہ خان ، مولانا حنیف جالندھری، اور ممتاز عالم دین مولانا حسن جان نے بھی شرکت کی۔

اعلامیہ کے مطابق جمعیت علمائے اسلام اسلامی نظام کے نفاذ کے لیے جمہوری اور آئینی جدوجہد پر یقین رکھتی ہے اور تمام تر واقعات سے لاتعلقی کا اعلان کرتے ہوئے کارکنوں کو ان سازشوں کو سمجھنے اور ان سے لاتعلق کرنے کی ہدایت کرتی ہے۔

اعلامیہ میں مزید کہا گیا ہے کہ سی ڈی اے اسلام اباد میں مساجد گرانے کے تمام نوٹس فوری طور پر واپس لیکر وہاں علماء کو مطمئن کرے اور جامعہ فریدیہ اور جامعہ حفصہ کا معاملہ مذاکرات کے ذریعے پرامن طور پر حل کیا جائے۔

اس سے قبل کنونشن سے خطاب کرتے ہوئے مولانا فضل الرحمان نے کہا کہ اگر امریکہ اور فوجی حکمرانوں کے ساتھ ڈیل کے نتیجے میں اگلی حکومت بے نظیر بھٹو کو دی گئی تو یہ پاکستان ٹوٹنے کا سبب بنے گا اور عوام بھی اس کی تائید نہیں کرینگے۔

ان کا کہنا تھا کہ ایم ایم اے اپوزیشن کے وسیع تر اتحاد کےلئے کوشاں ہے لیکن پی پی پی اس میں رکاوٹ ہے اور وہ امریکہ کو کئی گئی یقین دہانیوں کو محفوظ کرنے کےلیے ایم ایم اے کے خلاف بیان بازی کررہی ہے۔

اپوزیشن رہنما نے خبردار کیا کہ بے نظیر ان پر الزامات نہ لگائیں ورنہ وہ بھی منہ میں زبان رکھتے ہیں ۔ انہوں نے کہا کہ اگر دلائل کی بنیاد پر بات آئے تو محترمہ ان کے سامنے نہیں ٹھہر سکیں گی۔