محمد اشتیاق حسن ابدال

	امرتسر کے تاجر سورن سنگھ ہر سال دو مرتبہ پاکستان آتے ہیں

بیساکھی کا یہ تین سو آٹھواں میلہ ہے اور سکھ مذہب کے مطابق بابا گرو نانک کے جنم دن کے بعد سکھ مذہب کا یہ دوسرا بڑا تہوار ہے۔ حسن ابدال میں بیساکھی کی یہ تقریبات تین دن تک جاری رہیں گی۔

بیساکھی کا تہوار منانے ویسے تو ہندوستان سمیت مختلف ممالک سے ہزاروں سکھ گرودوارہ پنجہ صاحب آتے ہیں لیکن امرتسر بھارت کے باسی سورن سنگھ کی کہانی سب سے مختلف ہے۔

وہ ایک سچے گرو سیوک کی طرح گرد وارے میں آنے والوں کے جوتوں کی گزشتہ پندرہ سال سے بغیر کسی معاوضے کے حفاظت کرتے ہیں۔

سورن سنگھ ہر سال دو مرتبہ پاکستان آتے ہیں۔ بابا گرو نانک کے جنم دن اور بیساکھی کے مواقع پر وہ ’جوڑا گھر‘ میں جہاں جوتے رکھے جاتے ہیں، دن رات کام کرتے ہیں۔ پچاس سالہ سورن سنگھ اس سال بھی اپنے پورے گروپ کے ساتھ جن میں ان کے بچے اور بھائی شامل ہیں، بیساکھی کے موقع پر گردوارہ پنجہ صاحب کے ’جوڑا گھر‘ میں جوتوں کی رکھوالی پر لگے ہوئے ہیں۔

	سورن سنگھ پندرہ سال سے بیساکھی کے تہوار پر بغیر کسی معاوضے کے جوتوں کی حفاظت کرتے ہیں

امرتسر کے تاجر سورن سنگھ بنیادی طور پر سکیورٹی گارڈز کے لیے آہنی چوکیاں بناتے ہیں۔ اُن کا کہنا ہے کہ اُن کے باپ دادا بھی امرتسر میں ’جوڑا گھر‘ کی خدمت کرتے تھے اور اب وہ اور اُن کے بچے بھی اسی خدمت پر لگے ہوئے ہیں۔

سورن سنگھ ہر سال بیساکھی کے میلے پر تقریباً دس ہزار جوتے سنبھالتے ہیں، اُن کا کہنا تھا کہ وہ اس بات پر بہت خوش ہیں کہ پاکستان میں گرد واروں میں حاضری کے ساتھ اُنہیں خدمت کا بھی موقع ملتا ہے اور وہ یہ سب اپنے سکون اور خوشی کے لیے کرتے ہیں۔

سورن سنگھ نے حکومت پاکستان سے مطالبہ کیا کہ اُنہیں موقع دیا جائے کہ وہ لاہور میں داتا دربار کے عرس کے موقع پر بھی بغیر پیسے لیے عرس پر آنے والے زائرین کے جوتوں کی رکھوالی کریں۔

ان کا کہنا تھا: ’میں سوچتا ہوں کہ وہ لوگ جن کے پاس اپنے جوتوں کی حفاظت کے لیے دینے کو پانچ روپے تک نہ ہوں وہ داتا صاحب کا درشن بھی نہیں کر سکتے ہوں گے۔ میں چاہتا ہوں کہ ان کے عرس کے موقع پر زائرین کی خدمت کروں تاکہ اُنہیں یہ ڈر نہ ہو کہ جوتوں کی حفاظت کے لیے انہیں پیسے دینے پڑیں گے‘۔