علی سلمان بی بی سی اردو ڈاٹ کام لاہور

	پنجاب یونیورسٹی کے کیمپس پر ایسے تنازعات پہلے بھی دیکھے گئے ہیں

یونیورسٹی کے بعض طلبہ کا کہنا ہے کہ اسلامی جمعیت طلبہ نے پوری یونیورسٹی کو یرغمال بنا رکھا ہے۔ انہیں لڑکیوں کے لباس اور ان کا لڑکوں کے ساتھ بیٹھنے پر اعتراض رہتا ہے اور جو ان کی بات نہ ماننے اسے تشدد کا سامنا کرنا پڑتا ہے۔

شعبۂ ابلاغیات کے ایک طالب علم نے بتایا کہ دو روز پہلے ایک الگ واقعے میں ہیلی کالج آف کامرس کے ایک لڑکے اور لڑکی کی سرعام پٹائی کی گئی تھی۔

اسلامی جمعیت طلبہ نے لڑکیوں پر تشدد یا بدسلوکی کی تردید کی ہے اور کہا ہے کہ ان کے کارکنوں کو لڑکیوں سے بات کرنے یا انہیں روکنے ٹوکنے کی پابندی ہے اور جو اس کی خلاف ورزی کرتا ہے اسے تنظیم سے نکال دیا جاتا ہے۔

اسلامی جمعیت طلبہ پنجاب یونیورسٹی کے ناظم محمد ایوب نے کہاکہ ان کا موقف صرف یہ ہے کہ یونیورسٹی لباس کے معاملے میں اپنے قواعد کی پابندی کروائے۔

اسلامی جمعیت طلبہ کا موقف  اسلامی جمعیت طلبہ نے لڑکیوں پر تشدد یا بدسلوکی کی تردید کی ہے اور کہا ہے کہ ان کے کارکنوں کو لڑکیوں سے بات کرنے یا انہیں روکنے ٹوکنے کی پابندی ہے اور جو اس کی خلاف ورزی کرتا ہے اسے تنظیم سے نکال دیا جاتا ہے۔

پنجاب یونیورسٹی میں پچیس ہزار نوجوان لڑکے لڑکیاں زیرتعلیم ہیں اور ایک بڑی تعداد اسلامی جمعیت طلبہ کے زور زبردستی کے رویے کی شکایت کرتی ہے جمعیت سے شکوہ کرنے والوں میں اساتذہ بھی شامل ہیں۔

یونیورسٹی کے رجسٹرار ڈاکٹر نعیم خان نے بی بی سی گفتگو کرتے ہوئے کہا کہ یونیورسٹی میں طلبہ کے لیے لباس کے اخلاقیات مقرر ضرور ہیں لیکن ان حدود میں رہتے ہوئے طلبہ کو لباس کے معاملے میں انفرادی طور پر آزادی حاصل ہے اور کسی کو ان کی آزادی سلب کرنے کی اجازت نہیں دی جاسکتی۔

اسلامی جمعیت طلبہ کے ناظم کا کہنا ہے کہ یونیورسٹی انتظامیہ دہرے معیار کا مظاہرہ کرتی ہے، اسی پنجاب یونیورسٹی کے گوجرانوالہ کیپمپس میں آدھی آستین کی قمیض پہننے والی لڑکی کو ڈیڑھ ہزار روپے اور لڑکے لڑکی کے اکٹھے بیٹھنے پر انہیں دو ہزار روپے کا جرمانہ عائد کیا جاتا ہے لیکن باقی یونیورسٹی میں کھلی چھوٹ ہے۔

جمعیت کے ناظم نےکہا کہ کل جس طالب علم کو تشدد کانشانہ بنایا گیا وہ مبینہ طور پر ایک لڑکی سے بوس وکنار کر رہا تھا جس کا ثبوت ایک موبائل فون کی ویڈیو کی صورت میں ان کے پاس محفوظ ہے۔ انہو ں نے کہا کہ اس قسم کے واقعات ہوں گے تو صرف جمعیت کے کارکن ہی نہیں عام طلبہ بھی اشتعال میں آسکتے ہیں۔

پنجاب یونیورسٹی کے رجسٹرار ڈاکٹر محمد نعیم خان کا کہنا ہے کسی کو طلبہ پر تشدد کی اجازت نہیں دی جاسکتی۔انہوں نے کہا کہ تشدد کے حالیہ واقعہ پرتحقیقاتی کمیٹی دو روز میں انہیں رپورٹ پیش کردے گی۔

پنجاب یونیورسٹی پر گذشتہ کئی عشروں سے جماعت اسلامی کی ذیلی طلبہ تنظیم، اسلامی جمعیت طلبہ کا غلبہ رہا ہے اور یونیورسٹی میں ہونے والے زیادہ تر پرتشدد واقعات میں کسی نہ کسی طور اس طلبہ تنظیم کو ملوث قرار دیا جاتا رہا ہے۔

یونیورسٹی کی انتظامیہ کاکہنا ہے کہ اب یونیورسٹی میں اسلامی جمعیت طلبہ کا پہلے جیسا زور نہیں رہا اور انہیں من مانی نہیں کرنے دی جاتی۔

یونیورسٹی رجسٹرار نے کہا کہ جمعیت کو گزشتہ برس بک فیئر نہیں لگانے دی گئی اور اسی طرح جمعیت کی مخالفت کے باوجود یونیورسٹی میں شعبۂ موسیقی نہ صرف قائم ہوا بلکہ ان معاملات کی پرتشدد مخالفت کرنے والے پینتیس طلبہ کو یونیورسٹی سے نکال دیا گیا تھا۔