رفعت اللہ اورکزئی بی بی سی اردو ڈاٹ کام، پشاور

	مقامی لوگوں کا کہنا ہے کہ حملے کا نشانہ بظاہر فوجی قافلہ تھا (فائل فوٹو)

پولیس کے مطابق یہ واقعہ جمعرات کی دوپہر ٹل پارہ چنار روڈ پر تورغر کے علاقے میں اس وقت پیش آیا جب تین گاڑیوں پر مشتمل ایک فوجی قافلہ پارہ چنار سے ٹل جارہا تھا۔

ٹل پولیس کے ایس ایچ او حسین بادشاہ نے بی بی سی کو بتایا کہ دھماکہ فوجی قافلہ گزرنے کے بعد ہوا جس سے ایک فوجی اہلکار زخمی ہوا جبکہ واقعہ میں گاڑیوں کو کوئی نقصان نہیں پہنچا۔

مقامی لوگوں کا کہنا ہے کہ حملے کا نشانہ بظاہر فوجی قافلہ تھا تاہم دھماکہ تیسری فوجی گاڑی گزرنے کے بعد ہوا۔

واقعہ کے فوراً بعد اعلی فوجی اور پولیس حکام موقع پر پہنچے اور مرکزی شاہراہ کچھ دیر کےلیے بند رہی۔

تاحال یہ معلوم نہیں ہوسکا ہے کہ دھماکہ سڑک پر بارودی سرنگ نصب کرنے کے نتیجے میں ہوا یا ریموٹ کنٹرول بم کے ذریعے سے کیا گیا۔ دھماکے کی ذمہ داری ابھی تک کسی تنظیم نے قبول نہیں کی ہے۔

واضع رہے کہ ٹل ضلع ہنگو کی ایک تحصیل ہے جس کی سرحدیں قبائلی علاقے کرم ایجنسی اور شمالی وزیرستان سے ملتی ہیں۔