عدنان عادل بی بی سی ارود ڈاٹ کام، لاہور

	سیمنٹ، چینی، سٹیل مل اور سٹاک مارکیٹ سکینڈلز میں قوم کے اربوں روپے لوٹ لیے گئے

سنیچر کو مجلس عمل کے مرکزی رہنما لیاقت بلوچ کی جانب سے جاری کیے گئے حقائق نامے میں کہا گیا ہے کہ گزشتہ سات برسوں میں اشیائے صرف کی قیمتوں میں ساٹھ فیصد سے چار سو فیصد تک اضافہ کرکے عوام الناس کو زندہ درگور کردیا گیا ہے۔

حقائق نامے کے مطابق گزشتہ سات سال میں پٹرول اور ڈیزل کی قیمتوں میں اڑتالیس مرتبہ اضافہ کیا گیا اور بجلی، گیس اور پانی کے نرخ تین مرتبہ بڑھائے گئے ہیں۔

مجلس عمل کے مطابق جنرل مشرف کے درو میں سیمنٹ، چینی، سٹیل مل اور سٹاک مارکیٹ کے سکینڈل ہوئے جن میں قوم کے اربوں روپے لوٹ لیے گئے۔

مجلس عمل نے ایمنسٹی انٹرنیشنل کے حوالہ سے کہا ہے کہ ملک انسانی حقوق کی دھجیاں بکھیرنے والا ملک بن گیا ہے اور ٹرانپیرنسی انٹرنیشنل کی رپورٹ کے مطابق دنیا کے بدعنوان ترین ملکوں میں بارہویں نمبر پر ہے۔

حقائق نامے میں ضروریات زندگی کی چیزوں کی قیمتوں میں سات سال میں ہونے والے اضافے کا تفصیلی تقابلی جائزہ پیش کیا گیا ہے۔

مجلس عمل کے مطابق جنرل مشرف کی حکمرانی کے درو میں دودھ کی قیمت بارہ روپے لیٹر سے چونتیس روپے، چینی کی اٹھارہ روپے کلو سے بڑھ کر چھتیس روپے فی کلوگرام،گھی کی قیمت اڑتیس روپے سے بڑھ کر پینسٹھ روپے فی کلو گرام اور مٹی کا تیل گیارہ روپے فی لیٹر سے بڑھ کر چالیس روپے فی لیٹر ہوگیا ہے۔