ہارون رشید بی بی سی اردو ڈاٹ کام، پشاور

	ایم کیو ایم نے زلزلے کے بعد صوبہ سرحد کے متاثرہ علاقوں میں امدادی مہم چلائی تھی

اس موقع پر لندن سے ٹیلیفون کے ذریعے ایک خطاب میں ایم کیو ایم کے سربراہ الطاف حسین نے صوبہ سرحد کے حقوق کی بات کی۔ ان کا کہنا تھا کہ صوبے کو پختونخوا کا نام دیا جائے اور صوبے کو بجلی کے خالص منافع میں اس کا حصہ بھی فوراً دیا جائے۔

الطاف حسین نے سرحد کی حمایت میں اس بات کا بھی مطالبہ کر دیا کہ خوشحال خان خٹک، رحمان بابا اور باچا خان کے قومی دن بھی منائے جائیں۔ انہوں نے قبائلی علاقوں میں جاری فوجی آپریشن بند کرنے اور وہاں ایف سی آر کے قانون میں اصلاحات کا مطالبہ بھی دہرایا۔

پارٹی کے نئے دفتر کے افتتاح کے موقع پر ایم کیو ایم کے مرکزی کنوینر فاروق ستار، وفاقی وزیر سید صفوان اللہ، اراکین قومی اسمبلی حیدر عباس رضوی اور اقبال محمد علی کے علاوہ صوبائی کمیٹی کے نگران روشن خان اور زبیر انجم بھی موجود تھے۔

الطاف حسین نے الیکشن کمیشن سے انتخابات میں ’کتاب‘ کے نشان کے خاتمے کا مطالبہ کیا تاکہ بقول ان کے اس کو پختون ووٹروں کو قرآن قرار دے کر گمراہ نہ کیا جا سکے۔

متحدہ قومی موومنٹ یا ایم کیو ایم نے لاہور میں گزشتہ برس تیرہ اگست کو پہلا جلسہ عام منعقد کر کے پنجاب کی سیاست میں باضابطہ قدم رکھا تھا۔ تاہم آج کی افتتاحی تقریب سے یہ واضع نہیں ہوسکا کہ وہ سرحد میں اس قسم کے جلسے کا کیا منصوبہ رکھتی ہے۔

ایم کیو ایم نے آٹھ اکتوبر دو ہزار پانچ کے تباہ کن زلزلے کے بعد صوبہ سرحد کے بدترین متاثرہ علاقوں میں امدادی مہم چلائی تھی۔ سیاسی مبصرین کے مطابق اس وقت مثبت ردِ عمل کی وجہ سے شاید اسے صوبہ سرحد میں منظم کرنے کا فیصلہ کیا گیا ہو۔

تاہم ایم کیوایم کی صدر جنرل پرویز مشرف سے اتحاد کے باعث کئی مبصرین اس کی سرگرمیوں کو شک کی نگاہ سے بھی دیکھ رہے ہیں۔ ان کا خیال ہے کہ ایم کیوایم کو ریاستی اداروں کی سرپرستی میں ملک کے دیگر حصوں میں پھیلایا جا رہا ہے تاکہ صدر کے لیئے حمایت میں اضافہ ہوسکے۔