عدنان عادل بی بی سی اردو ڈاٹ کام، لاہور

	مقبولیت کے اعتبار سے بے نظیر بھٹو دوسری بڑی رہنما ہیں جبکہ مسلم لیگ(ن) کے سربراہ نواز شریف تیسرے نمبر پر ہیں

سنیچر کو ڈان میں شائع ہونے والی ایک رپورٹ کا کہنا ہے کہ امریکہ میں حکمران جماعت کے تحقیقی شعبہ ری پبلکن انسٹیٹیوٹ نے تین ماہ پہلے ستمبر میں پاکستان میں سیاسی معاملات پر رائے عامہ کا ایک سروے کروایا تھا جس کے نتائج ابھی باقاعدہ طور پر نشر نہیں کیے گئے تاہم اخبار نے اس سروے کے نتائج حاصل کیے ہیں۔

اس تحقیقی جائزہ کے مطابق پاکستان بھر میں مقبولیت کے اعتبار سے بے نظیر بھٹو دوسری بڑی رہنما ہیں جبکہ مسلم لیگ(ن) کے سربراہ نواز شریف تیسرے نمبر پر ہیں۔

تاہم جائزہ کے نتائج کے مطابق پیپلز پارٹی کی چئیر پرسن بے نظیر بھٹو صوبہ سندھ اور سرحد میں سب سے زیادہ مقبول رہنما ہیں اور ان کی پارٹی بھی ان دو صوبوں میں پہلے نمبر پر ہے۔

سروے نتائج کے مطابق پنجاب میں سرکاری مسلم لیگ اور بلوچستان میں متحدہ مجلس عمل سب سے مقبول جماعتیں ہیں۔ پنجاب میں دوسرے نمبر پر حزب اختلاف کی جماعت مسلم لیگ (نواز) ہے۔

	پاکستان مں ایک طبقۂ فکر کچھ ایسے بھی سمجھتا ہے

جن لوگوں سے سوالات پوچھے گئے ان میں سے ستر فیصد کا کہنا تھا کہ عام انتخابات سے پہلے بے نظیر بھٹو اور نواز شریف کو ملک واپس آنے کی اجازت دی جائے۔

اس جائزہ میں ستائیس اعشاریہ چار فیصد لوگوں نے کہا کہ وہ آئیندہ قومی اسمبلی کے انتخابات میں پیپلز پارٹی کو ووٹ دیں گے اور بائیس فیصد نے کہا کہ وہ پیلز پارٹی کو ووٹ دیں گے جبکہ سندھ میں چھیالیس فیصد نے کہا کہ وہ پیپلز پارٹی کو ووٹ دیں گے اور صرف چودہ فیصد لوگوں نے سرکاری مسلم لیگ کے حق میں رائے ظاہر کی۔

سروے کے مطابق جن لوگوں سے سوالات پوچھے گئے ان میں سے بائیس فیصد نے شوکت عزیز کو سب سے اچھا وزیراعظم قرار دیا جبکہ انیس فیصد نے بے نظیر بھٹو اور گیارہ فیصد نے نواز شریف کے حق میں رائے دی۔ سولہ فیصد لوگوں نے کہاکہ وہ اس بارے میں کچھ نہیں جانتے۔

اخبار نے یہ نہیں بتایا کہ یہ سروے کتنے افراد کے انٹرویوز پر مشتمل ہے اور اس میں غلطی کی گنجائش کتنی ہے۔