ریاض سہیل بی بی سی اردو ڈاٹ کام، کراچی

	این جی اوز کے مطابق کاروکاری کے الزام میں قتل کی جانے والی خواتین کی تعداد سرکاری اعدادوشمار سے دگنی ہے

یہ واقعہ بدھ کوصوبہ سندھ کے شہر شکارپور کے ایک دیہی علاقے عبدو میں پیش آیا۔

کاروکاری پر پہلی مقامی کارٹون فلم

پولیس کے مطابق ملزمان نے ایوب مہر کے گھر میں داخل ہوکر فائرنگ کی جس میں ایوب کی تین بیٹیاں سترہ سالہ نسیم ، تینتیس سالہ صفیہ، چالیس سالہ شھزادی اور ان کی بہو پینتیس سالہ نسیماں ہلاک ہوگئیں۔ مزاحمت کے دوران لڑکیوں کا بھائی منٹھار زخمی ہوگیا۔

پولیس کا کہنا ہے کہ ماہ رمضان میں ایوب مہر کی بیٹیاں سکھر میں کسی رشتہ دار کے گھر گئیں تھیں، جس پر ان کے ماموں نے ناراضگی کا اظہار کرتے ہوئے انہیں کاری قرار دیا تھا۔

مقتول خواتین کے بھائی گلبہار کا کہنا ہے کہ ان کی بہنوں پر کاری ہونے کا جھوٹا الزام عائد کیا گیا ہے وہ بے قصور تھیں۔

	کاروکاری کو ختم کرنے کی حکومتی یقین دہانیوں کے باجود اس الزام کی زد میں آنے والی خواتین کی تعداد میں خاطر خواہ کمی نہیں ہو سکی

انہوں نے بتایا کہ الزام عائد ہونے کے بعد وہ اپنے سردار کے پاس شکایت لیکر گئے تھے جنہوں نے یقین دہانی کروائی تھی کہ لڑکیوں کو کچھ نہیں ہوگا مگر اس کے باوجود ان کی بہنوں کو قتل کیا گیا۔

شکارپور پولیس کا کہنا ہے کہ واردات کے بعد ملزمان فرار ہوگئے ہیں جبکہ ان کے دو بیٹوں کو حراست میں لیا گیا ہے۔

واضح رہے کہ غیر مرد سے تعلقات رکھنے یا کاروکاری کے الزام میں ہر سال سندھ میں خواتین کی ایک بڑی تعداد قتل ہوجاتی ہے۔

صدر پرویز مشرف نے غیرت کے نام پر قتل کو عام قتل قرار دینے کا حکم دیا تھا مگر اس کے بعد بھی واقعات میں واضح کمی نہیں ہوئی ہے۔

سندھ اسمبلی میں گزشتہ دنوں صوبائی حکومت کی جانب سے پیش کیے گئے اعداد و شمار کے مطابق جنوری سے لیکر اگست تک ایک سو سے زائد افراد کو کارو کاری کے الزام میں قتل کیا گیا ہے، جن میں چونتیس مرد اور باقی خواتین تھیں۔

کارو کاری کے الزام میں قتل کے اکثر واقعات بالائی سندھ کے اضلاع میں ہوتے ہیں۔ حکومتی اعداد و شمار کے مطابق جیکب آباد اور قمبر میں اٹھارہ افراد، شکارپور اور سکھر میں تیرہ افراد قتل کیئے گئے ہیں۔
حکومتی اعداد شمار کے برعکس این جی اوز کے مطابق کارو کاری میں قتل ہونے والوں کی تعداد دوگنا ہے۔