ذوالفقار علی بی بی سی اردو ڈاٹ کام ، مظفرآباد

	ودای نیلم میں پہلے بھی کئی مرتبہ معصوم بچے بموں کی زد میں آ چکے ہیں

ہلاکتوں کا یہ واقعہ گزشتہ شام مظفرآباد کے شمال مشرق میں ایک سو نوے کلومیڑ دور وادی نیلم میں کیل کے علاقے میں پیش آیا۔ ہلاک والوں کی عمریں تین سے پانچ سال کے درمیان بتائی جاتی ہیں اور ان میں تین بہنیں بھی ہیں۔

حکام کا کہنا ہے کہ یہ بچیاں ریت میں کھیل رہی تھیں کہ اچانک بم پھٹ گیا جس کی وجہ سے یہ ہلاکتیں ہوئیں ۔

حکام کا کہنا ہے کہ یہ ریت مقامی لوگوں نے دریائے نیلم کے کنارے سے نکال کر تعمیرات کے لیے وہاں جمع کر رکھی تھی ۔

	پاکستانی فوجی دریائے نیلم کے پار سے دوسری طرف نظر رکھے ہوئے

ان کا کہنا ہے کہ نومبر سن دوہزار تین میں کشمیر کو تقسیم کرنے والی لائن آف کنڑول پر ہندوستان اور پاکستان کی فوجوں کے درمیان فائر بندی سے قبل ہندوستان کی فوج نے کافی تعداد میں لائن آف کنڑول کے پار سے کھلونا بم پھینکے تھے۔ انہوں نے کہا کہ ان میں اب بھی بہت سارے ایسے بم ہوں گے جو پھٹے بغیر رہ گئے اور بعض اوقات ان بموں کے پھٹنے سے لوگ ہلاک یا زخمی ہوجاتے ہیں۔

بھارت کے زیر انتظام کشمیر میں سن انیس سو اٹھاسی میں مسلح تحریک کے آغاز کے ساتھ ہی کشمیر کو تقسیم کرنے والی لائن آف کنڑول پر ہندوستان اور پاکستان کی فوجوں کے درمیان گولہ باری شروع ہوئی تھی اور تین سال سے گولہ باری کا یہ سلسلہ رکا ہوا ہے ۔ لیکن لائن آف کنڑول پر کھلونا بم بارودی سرنگ کے پھٹنے کے واقعات میں لوگوں کی ہلاکتوں یا زخمی ہونے کی اطلاعات ملتی رہتی ہیں۔