ذیشان حیدر بی بی سی اردو ڈاٹ کام، اسلام آباد

	سلامتی کونسل نے ایٹمی دھماکہ کرنے پر شمالی کوریا کے خلاف پابندیاں لگانے کا فیصلہ کیا ہے

پاکستانی دفتر خارجہ کی ترجمان تسنیم اسلم نے اپنی ہفتہ وار بریفنگ کے دوران شمالی کوریا کے مسئلے پر بات کرتے ہوئے کہا کہ پاکستان اس معاملے کے پرامن حل کے لیئے ’چھ ملکی مذاکرات‘ کے عمل کی جلد از جلد بحالی کا خواہاں ہے ’کیونکہ ہم سمجھتے ہیں کہ پابندیاں مسئلے کا حل نہیں‘۔

’مزید دباؤ اعلان جنگ کے مترادف ہوگا‘

انہوں نے کہا کہ تاہم اقوامِ متحدہ کا ایک ذمہ دار رکن ہونے کے ناطے پاکستان سلامتی کونسل کی جانب سے شمالی کوریا پر لگائی جانے والی پابندیوں کی حمایت کرتا ہے۔ لیکن ان کا کہنا تھا کہ پاکستان اپنی جانب سے شمالی کوریا پر کسی قسم کی پابندیاں عائد نہیں کرے گا۔

تسنیم اسلم کا کہنا تھا کہ

تعاون جاری رہے گا  پاکستان شمالی کوریا سے نہ صرف سفارتی اور تجارتی تعلقات منقطع نہیں کرے گا بلکہ جو شعبے اقوامِ متحدہ کی پابندیوں کی زد میں نہیں آتے ان میں دونوں ممالک میں تعاون بھی جاری رہے گا۔ ترجمان دفتر خارجہ

افغان وزیرِ خارجہ کے طالبان اور پاکستان سے متعلق حالیہ بیان پر تبصرہ کرتے ہوئے تسنیم اسلم کا مؤقف تھا کہ ایسا معلوم ہوتا ہے کہ افغان وزیرِ خارجہ نے صدر مشرف کے ایک ایسے بیان پر اپنے خیالات کا اظہار کیا ہے جو ایک ماہ قبل دیا گیا تھا۔

انہوں نے کہا کہ افغان حکومت کو بیان بازی کی بجائے اپنے داخلی معاملات پر توجہ دینی چاہیئے کیونکہ یہ بات واضح ہو چکی ہے کہ طالبان کو افغانستان میں اپنی کارروائیوں کے دوران مقامی افغانوں کی مدد حاصل ہے ۔

دفترِ خارجہ کی ترجمان نے پاک انڈیا تعلقات پر ایک سوال کے جواب میں کہا کہ پاکستان اور انڈیا کے تعلقات میں بہتری آئی ہے۔ ان کا کہنا تھا کہ ایک وقت تھا کہ انڈیا کی دس لاکھ فوج ہماری سرحدوں پر موجود تھی جبکہ آج دونوں ممالک تصفیہء طلب معاملات پر فیصلہ کن بات چیت کر رہے ہیں اور دونوں طرف کی قیادت ان کے حل کی خواہاں ہے۔ انہوں نے بتایا کہ خارجہ سیکرٹری سطح پر بات چیت نومبر میں ہو گی تاہم اس سلسلے میں تاریخ ابھی طے نہیں کی گئی۔

تسنیم اسلم نے جنوبی کوریا کے وزیر خارجہ بین کیمون کی بطور سیکرٹری جنرل اقوام متحدہ تقرری کا خیر مقدم کرتے ہوئے کہا کہ پاکستان نے اس عہدے کے انتخاب کے دوران بھی ان کی حمایت کی تھی اور پاکستان یہ امید رکھتا ہے کہ وہ مسئلہ کشمیر سمیت دنیا کو درپیش مسائل کے حل کے لیئے مثبت کوششیں کریں گے۔