عدنان عادل بی بی سی اردو ڈاٹ کام، لاہور

	ملزم کا تعلق منڈیاں ضلع ایبٹ آباد سے بتایا جارہا ہے

پولیس نے ملزم کا نام تمیم عرف عمر بتایا ہے جو عبدالرحٰمن، طاہر اور وکیل کے نام بھی استعمال کرتے رہے ہیں۔

پولیس کا کہنا ہے کہ اسے اطلاع ملی تھی کہ لاہور میں مبینہ طور پر دہشت گردی کی واردات کی جانے والی ہے جس کی تفتیش کے دوران اس نے لاری اڈے کے پاس ایک مزار سے تمیم کو گرفتار کیا۔

پولیس نے دعوٰی کیا ہے کہ اس نے ملزم کے پاس سے چار دستی بم، ڈیٹونیٹر، بارود اور نقشے وغیرہ برآمد کیئے ہیں۔

ملزم کا تعلق منڈیاں ضلع ایبٹ آباد سے ہے۔ ان دنوں وہ گاؤں شیلابی ضلع صوابی (سرحد) میں رہائش پذیر تھے اور لاہور آئے ہوئے تھے۔

ملزم نے کراچی کے ایک مدرسے سے درس نظامی کا کورس کرنے کے بعد وزیرستان (شکئی) میں اسلحہ چلانے کی تربیت حاصل کی تھی۔

پولیس کے مطابق وہ افغانستان کے صوبوں زابل اور ارزگان میں عسکریت پسندوں کو مبینہ طور پر مارٹرگن، میزائیل، بارودی سرنگیں نصب کرنے اور گولہ بارود کی تربیت دیتے رہے ہیں۔