اعجاز مہر بی بی سی اردو ڈاٹ کام، اسلام آباد

	شوکت عزیز کے خلاف تحریک 126 ارکان نے پیش کی ہے

یہ بات انہوں نے جمعرات کے روز پارلیمان میں واقع اپنے چیمبر میں سابق وزراءاعظم میر ظفراللہ جمالی اور چودھری شجاعت حسین سمیت بعض وفاقی وزراء کے ہمراہ نیوز کانفرنس میں کہی۔

انہوں نے دعویٰ کیا کہ حزب مخالف کی عدم اعتماد کی تحریک ان کی حکومت پر انتیس اگست کو اعتماد کی تحریک ثابت ہوگی۔

وزیراعظم نے بتایا کہ سپیکر قومی اسمبلی کے پاس ایک اجلاس ہوا جس میں حکومت اور حزب مخالف کے نمائندوں نے طے کیا ہے کہ تحریک پر ووٹنگ انتیس اگست کو ہوگی۔

انہوں نے کہا کہ حزب مخالف کی جانب سے پیش کردہ پانچ سو صفحات پر مشتمل دستاویزات میں کوئی نئی بات نہیں ہے۔

نیوز کانفرنس کے موقع پر چودھری شجاعت حسین نے کہا کہ حزب مخالف کے مطالبے پر عمل کرتے ہوئے سابق وزیراعظم بینظیر بھٹو کے خلاف عدم اعتماد کے وقت جو طریقہ کار اپنایا گیا تھا اب بھی اس پر عمل ہوگا۔

انہوں نے بتایا کہ بینظیر بھٹو کے وقت حزب مخالف کے چار اراکین نے بحث میں حصہ لیا تھا اور بعد میں انہوں نے اس کا جواب دیا تھا اور ووٹنگ ہوئی تھی۔ ان کے مطابق اب بھی ویسے ہی ہوگا۔

اس بارے میں پیپلز پارٹی کے رہنما مخدوم امین فہیم نے علیحدہ ایک نیوز بریفنگ میں کہا ہے کہ حکومت کے ساتھ کوئی بات طئے نہیں ہوئی ہے اور اب اربوں روپے کی بدعنوانی کے معاملات ہیں جس پر وہ تمام اراکین بات کریں گے جنہوں نے دستخط کیئے ہیں۔

ایک سوال پر انہوں نے کہا کہ اگر حکومت نے تمام اراکین کو بولنے کی اجازت نہ دی تو حزب مخالف کیا کرے گی یہ انتیس اگست کو پتہ چل جائے گا۔