اعجاز مہر بی بی سی اردو ڈاٹ کام، اسلام آباد

	حزب اختلاف نے بھی قدیر خان سے ملاقات کا مطالبہ کیا ہے

مخدوم امین فہیم اور قاضی حسین احمد سمیت مختلف جماعتوں کے رہنماوں اور حزب مخالف کے کئی اراکین پر ڈاکٹر قدیر خان کے ساتھ ناروا سلوک کرنے اور انہیں نظر بند رکھنے پر حکومت کو تنقید کا نشانہ بنایا۔

حکمران مسلم لیگ کے سربراہ چودھری شجاعت حسین نے ایوان کو بتایا کہ وہ وزیر اطلاعات محمد علی درانی کے ہمراہ آج ڈاکٹر قدیر خان سے مل کر آئیں ہیں اور ان کی حالت بہتر ہے۔ انہوں نے ایوان کو بتایا کہ حکومت ان کو بہترین طبی سہولیات فراہم کر رہی ہے اور ڈاکٹر خان ان سے مطمئن ہیں۔

وزیر اطلاعات محمد علی درانی نے کہا کہ وہ حکومت کی جانب سے ان کی خیریت دریافت کرنے گئے تھے اور اب ان کی حالت بہتر ہے اور ڈاکٹر خان چل پھر سکتے ہیں۔ ان کے مطابق ڈاکٹر خان انہیں خود دروازے تک چھوڑنے آئے۔

وزیر نے کہا کہ حزب مخالف ہر بات میں منفی پہلو تلاش نہ کرے اور اُسے سیاسی رنگ دینے کی کوشش سے باز رہے۔ تاہم انہوں نے حزب مخالف کے رہنماوں کی جانب سے ڈاکٹر قدیر خان سے ملاقات کرنے کے مطالبے کے بارے میں کچھ نہیں کہا۔

قبل ازیں تہمینہ دولتانہ سمیت بعض اراکین نے تجویز دی کہ پاکستان میں شوکت خانم میموریل ہسپتال کینسر کے علاج کا بہترین مرکز ہے اس لیے حکومت ڈاکٹر قدیر خان کو وہاں منتقل کرے۔

پارلیمانی امور کے وزیر ڈاکٹر شیر افگن نیازی نے کہا ڈاکٹر قدیر خان آج بھی قوم کے ہیرو ہیں اور وہ رہیں گے۔

چودھری شجاعت حسین نے ایک نجی ٹی وی چینل جیو کو انٹرویو دیتے ہوئے کہا تھا کہ ڈاکٹر خان کل بھی محب وطن تھے اور آج بھی محب وطن ہیں۔
واضح رہے کہ فروری سن دو ہزار چار میں جب سے ڈاکٹر قدیر خان نے ایران، لبیا اور شمالی کوریا کو جوہری ٹیکنالوجی اور مواد بیچنے کا اقرار کیا تھا اس وقت سے انہیں غیر اعلانیہ طور پر گھر میں نظر بند کر کے رکھا گیا ہے۔

ان سے ملاقات پر پابندی ہے اور یہ پہلا موقع ہے کہ کوئی سیاسی رہنما یا وزیر کو فوجی حکام نے ان سے ملنے کی اجازت دی ہے۔