اعجاز مہر بی بی سی اردو ڈاٹ کام، اسلام آباد

	برطانیہ میں تحقیقات جاری ہیں۔

وزارت خارجہ کی ترجمان تسنیم اسلم کی جانب سے اسلام آباد میں جاری ایک بیان کے مطابق برطانوی شہری راشد روف کو گزشتہ دنوں پاکستان سے برطانوی حکومت کی جانب سے فراہم کردہ معلومات کی بنیاد پر گرفتار کیا گیا تھا۔

بیان میں وضاحت کی گئی ہے کہ پاکستان میں گرفتاریوں کے بعد ملنے والی معلومات کی بنیاد پر برطانیہ میں تین مقامات پر چھاپے مارے گئے۔

خیال ہے کہ برطانیہ میں گرفتار ہونے والوں میں راشد روف کے رشتہ دار بھی ہوسکتے ہیں۔

وزارت خارجہ کے بیان میں یہ بھی بتایا گیا ہے کہ ان تحقیقات سے ایسے اشارے ملے ہیں کہ ملزم کے افغانستان میں القاعدہ سے رابطے تھے۔ پاکستانی حکام کے مطابق انہیں سرحدی علاقے سے گرفتار کیا گیا تھا۔

بیان میں اس منصوبے کو ناکام بنانے میں پاکستان کے کردار کو اہم قرار دیتے ہوئے اور بین الاقوامی سطح پر خفیہ معلومات کے موثر تبادلے کی ضرورت پر زور دیا گیا ہے تاکہ بیان کے مطابق ’دہشت گردی کا مقابلہ کیا جا سکے‘۔

بیان میں دوسرے گرفتار برطانوی شہری یا باقی افراد کے بارے میں کچھ نہیں بتایا گیا ہے۔