عدنان عادل بی بی سی اردو ڈاٹ کام، لاہور

	اب مسافر کوئی بیگ اپنے ساتھ جہاز کے اندر نہیں لے جاسکتے

پی آئی اے کے ترجمان کے مطابق آج محکمہ دفاع نے ایک سرکلر جاری کیا ہے جس کے تحت پاکستان سے بیرون ملک جانے والی کسی بھی پرواز میں کوئی مسافر چند چیزوں کے سوا کوئی دستی سامان نہیں لے جاسکے گا۔

جن چیزوں کی اجازت دی گئی ہے ان میں سفری دستاویزات، عام چابیاں، خشک دودھ اور ضروری دوائیں شامل ہیں جنہیں ایک پولی تھین کے آر پار نظر آنے والے لفافے میں ڈال کر مسافر اپنے ساتھ لے جا سکتا ہے۔

ترجمان کے مطابق جن چیزوں پر پابندی لگائی گئی ہے ان میں الیکٹرانک کا تمام سامان جیسے موبائل فون، کیمرا، لیپ ٹاپ، الیکٹرانک چابیاں اور مائع اشیا جیسے پانی، شربت اور کاسمیٹک کی چیزیں جیسے لپ سٹک وغیرہ بھی شامل ہیں۔

ترجمان کے مطابق اب مسافر کوئی بیگ اپنے ساتھ جہاز کے اندر نہیں لے جاسکتے بلکہ انہیں یہ اپنے سامان کے ساتھ بک کروانا ہوگا۔

آج لاہور سے مانچسٹر کے لیئے پرواز روانہ ہوئی تو مسافر ان نئے قواعد سے لاعلم تھے۔ انہیں ائر پورٹ پر شفاف لفافے مہیا کیے گئے تاکہ وہ چند ضروری چیزیں ان میں ڈال کر اپنے ساتھ رکھیں۔ ان کا باقی دستی سامان بک کیا گیا۔

ترجمان کے مطابق دستی سامان لے جانے پر یہ نئی پابندیاں اندرون ملک کی پروازوں پر عائد نہیں ہوں گی۔