ریاض سہیل
بی بی سی اردو ڈاٹ کام کراچی |  |
| | | کراچی سے بھارت براستہ کھوکھراپار جانے والی تھرایکسپریس حیدرآباد سے چلائی گئی |
کراچی سے اندرون ملک ٹرین سروس تقریباً ایک ہفتہ بند رہنے کے بعد سنیچر کی سہ پہر بحال کردی گئی۔ کراچی سے روانہ ہونے والی پہلی ٹرین علامہ اقبال ایکسپریس تھی جو سنیچر کو اپنے مقررہ وقت پر روانہ ہوئی جبکہ کراچی پہنچنے والے پہلی گاڑی خیبر ایکسپریس تھی جو رن پٹھانی کے مقام پر بنائےگئے عارضی ٹریک سے گزر کر کراچی پہنچی۔ اس کے بعد کراچی سے ٹرینوں کی آمدرفت کا سلسلہ بحال ہوگیا۔ پاکستان ریلویز کراچی کے ڈویژنل سپرٹنڈنٹ ناصر زیدی نے بتایا کہ بارشوں کی وجہ سے دھابیجی اور جنگ شاہی کے درمیان پانی کے تیز بہاؤ کی وجہ سے ٹوٹنے والے پل کی جگہ عارضی ٹریک بنایا گیا ہے۔ اس پل پر سے آزمائشی گاڑی گزارنے کے بعد مسافر گاڑیوں کی سروس بحال کردی گئی ہے۔ تاہم انہوں نے بتایا کہ دھابیجی اور جنگ شاہی کے درمیان ٹرین کی رفتار کم رہے گی اورگاڑی زیادہ وقت لے گی۔ ریلوے پل ٹوٹنے کے بعد کراچی سے اندرون ملک چلنے والی ٹرینیں حیدرآباد سے چلائی جا رہی تھیں۔ مسافروں کو کراچی سے حیدرآباد اور اندرون ملک سے ریل گاڑیوں میں پہنچنے والے مسافروں کو حیدآباد سے کراچی بذریعہ بس پہنچایا جا رہا تھا۔ کراچی سے براستہ کھوکھراپار بھارت جانے والی تھر ایکسپریس بھی جمعہ کے روز حیدرآباد سے چلائی گئی تھی۔ دریں اثناء وفاقی حکومت نے رن پٹھانی کے مقام پر ریلوے پل بہہ جانے کے واقعے کی تحقیقات کا حکم دے دیا ہے۔ وفاقی ریلوے انسپکٹر نو اور دس اگست کو کراچی ریلوے سٹیشن پر اور پندرہ اگست کو لاہور ریلوے سٹیشن پر معاملے کی تحقیقات کریں گے۔ | 
کراچی لاہور ٹرینیں بند، پانچواں دن 
