ہارون رشید بی بی سی اردو ڈاٹ کام، پشاور

	مالکان اور مزارعین کے درمیان امدادی رقوم پر تناؤ کافی عرصے سے چلا آ رہا ہے۔

بٹ گرام سے موصول اطلاعات کے مطابق یونین کونسل ترند میں پیر کی صبح آٹھ بجے کے لگ بھگ مالکوں اور مزارعین کے درمیان ایک مکان کی تعمیر پر اختلافات نے خطرناک صورت اخیتار کرلی اور مخالفین نے ایک دوسرے پر گولی چلا دی۔

یہ مکان آٹھ اکتوبر کے زلزلے میں تباہ ہوا تھا۔ اس کی دوبارہ تعمیر اور اس سلسلے میں حکومت سے ملنے والی امدادی رقم پر فریقین کے درمیان تنازعہ کافی عرصے سے چل رہا تھا۔

اس تصادم میں مالکان کی جانب سے تین افراد ہلاک جبکہ ایک زخمی ہوا ہے۔ ہلاک ہونے والوں میں چالیس سالہ ظاہر شاہ، طوطی شاہ اور اس کا بیٹا علی سعید شامل ہیں۔

دوسری جانب مزارعین کے بھی تین افراد کے زخمی ہونے کی اطلاع ہے تاہم پولیس سے اس کی تصدیق نہیں ہوسکی ہے۔ مزارعین اس واقعے کے بعد روپوش ہوگئے ہیں۔ابھی تک کوئی گرفتاری بھی عمل میں نہیں آئی ہے۔

بٹگرام کے قائم مقام ناظم نیاز محمد خان نے بی بی سی کو بتایا کہ ایسے واقعات کی ذمہ داری زلزلہ زدگان کی بحالی کے ادارے ’ایرا‘ اور وفاقی و صوبائی حکومتوں پر عائد ہوتی ہے کیونکہ یہ ان کی پالیسیوں کا ہی نتیجہ ہے۔

بٹگرام میں امدادی رقوم پر مالکان اور مزارعین کے درمیان تناؤ کافی عرصے سے چلا آ رہا ہے۔ اپنی اپنی جگہ دونوں فریقوں کا موقف ہے کہ امداد کے مستحق وہ ہیں۔