میثاق جمہوریت پر بے نظیر اور نواز شریف نے دستخط کر دیئے ہیں

یہ بات پاکستان کی حزب اختلاف کی جماعتوں کے اتحاد برائے بحالی جمہوریت میں شامل اسلامک ڈیموکریٹک فرنٹ کے صدر منیر حسین گیلانی نے لندن میں بی بی سی اردو سروس سے اپنے ایک انٹرویو میں کہی۔

ایک سوال کے جواب میں انہوں نے واضح کیا کہ میثاق جمہوریت فوج کے خلاف نہیں ہے بلکہ یہ سیاسی نظام میں فوج کی مداخلت سے پیدا ہونے والے تعطل کا تدارک کرنے کی سعی ہے۔

انہوں نے کہا کہ صدر مشرف نے اقتدار میں آتے ہی یہ بات کہی تھی کہ نیشنل سکیورٹی کونسل کی تشکیل سے سیاسی عمل میں فوج کی مداخلت سے پیدا ہونے والے تعطل کو روکنے میں مدد ملے گی۔

انہوں نے کہا کہ وہ سمجھتے ہیں کہ اصولی طور پر مسلم لیگ ق اور صدر مشرف بھی فوج کی مداخلت کے حق میں نہیں ہے اور اسی لیئے انہیں بھی میثاق جمہوریت پر دستخط کرنے چاہیں۔

ایک اور سوال کے جواب میں انہوں نے کہا کہ موجودہ اسمبلیوں سے صدر مشرف کے دوبارہ صدر منتخب ہونے کے منصوبے کو ناکام بنانے کے لیئے اے ار ڈی پوری کوشش کرے گی۔

اس موقعے پر موجود اے آر ڈی کے رابط کار ملک حاکمین خان نے کہا کہ میثاق جمہوریت میں متحدہ مجلس عمل کو بھی شامل ہونا چاہیے۔ انہوں نے کہا کہ متحدہ مجلس عمل اور اے آر ڈی میں اسمبلیوں کے اندر اشتراک عمل رہا ہے اور اس کو وسعت دی جاسکتی ہے۔

انہوں نے کہا کہ پاکستان میں جمہوریت کی بحالی کے لیئے ایم ایم اے کو اپنا کردار ادا کرنا ہوگا۔