عدنان عادل بی بی سی اردو ڈاٹ کام، لاہور

	امتیاز احمد لالی جھنگ سے سرکاری مسلم لیگ کے رکن صوبائی اسمبلی منتخب ہوئے تھے

گزشتہ عام انتخابات میں امتیاز احمد لالی جھنگ کے حلقہ نمبر 80 سے حکومتی مسلم لیگ کے رکن صوبائی اسمبلی منتخب ہوئے تھے جس کے خلاف سنہ دو ہزار دو میں ان کے حریف غلام محمد لالی نے ایک انتخابی عذرداری دائر کی تھی۔

اس عذر داری میں کہا گیا تھا کہ امتیاز لالی پولیس میں سب انسپکٹر کی ملازمت سے دانستہ غیر حاظری کے باعث فارغ کیے گئے تھے اور یہ بات’مِس کنڈکٹ‘ کے زمرے میں آتی ہے جس کی بنا پر وہ قانون کے تحت الیکشن لڑنے کے اہل نہیں تھے۔

درخواست گزار نے یہ اعتراض کاغدات نامزدگی جمع کرانے کے وقت ریٹرننگ افسر کے سامنے بھی اٹھایا تھا جنہوں نے امتیاز لالی کے کاغدات نامزدگی مسترد کردیے تھے لیکن لاہور ہائی کورٹ نے انہیں الیکشن لڑنے کی اجازت دے دی تھی۔

جمعہ کولاہور ہائی کورٹ کے انتخابی ٹرائبیونل کے جج سید زاہد حسین نے اپنے فیصلے میں امتیاز لالی کے خلاف اعتراض کو منظور کرتے ہوئے کہا کہ الیکشن کمیشن آف پاکستان ان کے کامیاب ہونے کا نوٹیفکیشن کالعدم کردے اور ان کی نشست پر نئے الیکشن کرائے جائیں۔

امتیاز لالی سنہ انیس سو ستانوے کے عام انتخابات میں بھی رکن پنجاب اسمبلی منتخب ہوئے تھے۔