ظفر عباس بی بی سی اردو ڈاٹ کام، اسلام آباد

	اپوزیشن نے ایوان سے واک آؤٹ کیا

اجلاس کے آغاز پر امورِ خزانہ کے وزیرِ مملکت عمر ایوب بجٹ تقریر پیش کرنے کے لیئے کھڑے ہی ہوئے تھے کہ حزبِ اختلاف کے چند اراکینِ اسمبلی اپنی نشستوں پر کھڑے ہو گئے اور نکتۂ اعتراض پر تقریر کرنے کی اجازت چاہی۔

دفاعی بجٹ میں گیارہ فیصد اضافہ

بجٹ سے غریب کو کیا ملا؟

یہ بجٹ اجلاس کی روایت سے ہٹ کر تھا اور ایسا محسوس ہوا کہ کچھ شور مچے گا لیکن سپیکر نے حزبِ اختلاف کی تین بڑی جماعتوں کے رہنماؤں کو مختصر تقریر کی اجازت دے دی جس سے یہ ثابت ہوا کہ یہ پہلے سے طے شدہ پروگرام کے مطابق تھا۔

قائد حزبِ اختلاف مولانا فضل الرحمان کا اعتراض تھا کہ بجٹ کو ایک خفیہ دستاویز ہونا چاہیئے جبکہ اس کی تفصیل سارا دن ملک کے مختلف ٹی وی چینلوں پر نشر کی جاتی رہی۔ انہوں نے اسے ایک مجرمانہ غفلت قرار دیا اور وزیرِ خزانہ کے استعفٰی کا مطالبہ کیا۔

پی پی پی کے مخدوم امین فہیم اور مسلم لیگ نواز گروپ کے چودھری نثار علی کی تقاریر کے فوراً بعد حزبِ اختلاف کے اراکین احتجاجاً اجلاس سے واک آؤٹ کر گئے۔ دلچسپ بات یہ ہے کہ بجٹ اجلاس کا حصہ ہونے کے باوجود سرکاری ٹی وی پر جہاں سپیکر کی آمد کو براہِ راست دکھایا گیا وہیں اپوزیشن اراکین کی تقاریر اور واک آؤٹ کو بالکل کوریج نہیں دی گئی اور عمر ایوب کی تقریر کے آغاز کے ساتھ ہی براہِ راست نشریات کا دوبارہ آغاز ہوا۔

موجودہ حکومت نے معیشت کو اس قدر مستحکم کر دیا ہے کہ غربت کی شرح میں خاصی کمی ہوئی ہے اور عام آدمی پہلے سے زیادہ خوشحال ہے۔ عمر ایوب

تقریر کے دوران اپوزیشن کی غیر موجودگی کا فائدہ اٹھاتے ہوئے حکومتی اراکین پرزور طریقے سے حکومتی کارکردگی کو سراہتے رہے۔ عمر ایوب کی تقریر میں جہاں بجٹ کے تخمینے پیش کیئے گئے وہیں ملک کی سیاسی اور معاشی صورتحال اور حکومتی کاکردگی کا جائزہ بھی لیا گیا۔ انہوں نے اپنی تقریر کے آغاز میں آٹھ اکتوبر کے زلزلے اور اس کے نتیجے میں حکومت کو درپیش آنے والے مسائل کا ذکر کرتے ہوئے کہا کہ جس طریقے سے اس سانحے سے نمٹا کیا وہ ظاہر کرتا ہے کہ ملک سیاسی اور اقتصادی لحاظ سے مستحکم ہے۔

ان کا دعوٰی تھا کہ اگر یہ زلزلہ نوے کے عشرے میں آیا ہوتا تو اس وقت کی حکومتیں اور معیشت اس سے نمٹ نہیں سکتی تھیں۔ عمر ایوب نے اپنی تقریر میں وقفے وقفے سے ماضی کی حکومتوں اور وزرائےاعظم پر تنقید جاری رکھی۔

ایک موقع پر عمر ایوب نے دعوٰی کیا کہ موجودہ حکومت نے معیشت کو اس قدر مستحکم کر دیا ہے کہ غربت کی شرح میں خاصی کمی ہوئی ہے اور عام آدمی پہلے سے زیادہ خوشحال ہے۔ انہوں نے کہا کہ نہ صرف بیرونی قرضو ں کا کشکول توڑ دیا گیا ہے بلکہ لوگ اب کشکول رکھنے والوں کو منتخب بھی نہیں کریں گے۔

بعد ازاں وزیرِمملکت برائے خزانہ نے بجٹ کے اعدادوشمار پیش کیئے۔ ان اعداد و شمار پر اقتصادی اور معاشی ماہرین کی رائے تو سامنے آئے گی ہی لیکن توقع کے عین مطابق بجٹ تقریر کے خاتمے پر اپوزیشن نے اسے عوام دشمن قرار دیتے ہوئے مسترد کر دیا۔